紅火球Lancer2.0借筍重生

近十年日系大廠愛將旗下辣跑斯文化，由Skyline、Civic甚至掃把佬等一代街飛，均推出斯文版或旅行車，當然家庭客一定比嗜辣人士多，所以體諒三菱將近代Lancer隱惡揚善，但到港新一代居然有大驚喜！首度採用同廠超辣露筍車架、將Lancer提升至2.0級、天窗皮椅應有盡有，霸氣升級齊料享受，可算借露筍而重生！

記者：梁美甜
攝影：譚盈傑
模特兒：Suyen

火紅房跑型格　正!

第一眼見到全新Lancer2.0，一個字講晒：「正！」大家咪怪我過於豪氣，陽光下火紅新Lancer就好似一個火球，搶眼到不得了。Lancer2.0沿用十代露筍嘅紮實車架，足夠剛性有利攻彎。外觀設計則比十代斯文，頭冚線條柔和了，再配搭偏向穩重造型嘅鬼臉罩及頭燈，高腰線車側線條為車身畫出層次，頭長尾短設計為房車格調加入不少跑車味道，最正係原廠全車包圍及18吋軨、AFS轉向頭燈等全部原廠跟車，不但令Lancer重回霸氣之路，而且毋須加錢另購，車價二十萬有找抵上加抵。

■驟眼望落好有露筍霸氣，頭長尾短回歸跑車格。

■單看尾燈，好惡好精神，有別舊版般斯文。

■原廠18吋胎軨，見到已經煞晒！

■網狀鬼臉罩酷似露筍，為Lancer增添更多跑車味道。

■稍嫌新版尾翼有點誇張，似大餐枱。

■原廠包圍已夠睇，毋須再改。

性能直迫跑房　爽！

全新Lancer同日本頂級版GalantFortis2.0Sport相若，引擎由過往嘅1.5公升提升為2.0公升MIVEC偈，再配備全新INVECS-III六前速漸進式自動變速系統及SportsMode，最大馬力輸出達154匹及20.2kgm扭力，軚盤設有加減撥片，操控更揮灑自如。心癢癢走一轉，坐上駕駛座感覺舒服，由皮料包覆嘅軚盤大小適中，而且手感唔錯，放眼望並無因頭長而影響視野，輕踩油門，「呼！」順而滑，反應敏捷加速一流，軚硬Brake靈敏，揸起嚟感覺超爽！

■車窗同車門比例1:2，B柱後移增添開揚感。

■內裝設計偏向簡約。

■內櫳夠大，五個大男人都唔會太逼。

■美甜實試跑一圈，感覺操控容易，加速爽快。

實用享受兼備　抵！

睇外形直迫中高房車，點知內裝亦有驚喜，好似個大天窗咁，唔係一般房車Standard喇啩！新車尺寸比過往加大咗，內櫳空間相對提升，迫狹感欠奉囉！
雖然Lancer2.0係一部房車，但外形及配置好有跑車格，而且實用性高，大家坐得舒服唔在講，尾箱容積大到嘩一聲，擺幾個手提行李之外，放多幾袋戰利品都仲得，以女性眼光而言，Lancer2.0剛中帶柔嘅味道比十代那種單一霸氣來得吸引，斯文又得跑又得，坐足五人擺幾箱雜物喺尾箱FullLoading都仲跑得，正！

■軚環附設加減撥片，操控更易更全面。

■無匙系統令豪華感提升不少。

■有埋大天窗毋須加錢，爽！

三菱Lancer2.0規格

引擎：1,998c.c.直4DOHC
馬力：154ps/6,000rpm；
扭力：20.2kgm/4,250rpm
傳動：INVECS-III六前速漸進式自動波
查詢：環宇汽車（24119511）