左丁山走咗去台北兩三日，無非吃喝睡覺，買書買鳳梨餅買牛肉亁，叫做促進台灣消費。多年老友證券D派司機到機場接機，叫司機全天候跟住，真係多謝晒。證券D話佢間公司有十幾部車，供職員使用，調一部跟住左丁山，全無問題。左丁山成世人冇咁威過，去到邊都有司機、汽車等候，感覺非常過癮，如水鬼升城隍。
司機車左丁山到重慶南路行書局，經過武昌街，真係有一間城隍廟喺度，叫做台灣省城隍廟。俗語云，到城隍廟都唔求支簽？於是行入去參拜上香，順手攞咗一本城隍廟出版嘅《中華民國九十七年農民曆》（即係香港嘅通勝）。又有咁啱嘅，台灣朋友成衣L打電話嚟問：「喂，戊子年開工吉日係邊日呀？」打開本農民曆睇吓，寫明二月十二日星期二年初六係開工吉日，萬事皆宜。但成衣L話：「我老婆自香港買咗本通勝返嚟，好似唔係咁寫。」成衣L夫婦皆是香港人，住在台灣多年，不如入鄉隨俗，信台灣農民曆啦，何必睇香港通勝。
返到香港，查吓通勝，年初六壬午日只宜祭祀拆卸，與台灣農民曆講法唔同，果然兩地有別，至於點解？左丁山唔識噃。記得成衣L話台灣經濟獨發電子、石化、塑膠，即係郭台銘、王永慶大晒，其他就冇乜好搵，但有一行就興旺非常；成衣L位弟婦離開製衣廠後，搵唔到工，卒之去咗一位「師傅」處做行政秘書，幾乎做到唔使放工，年尾有花紅分㖭。呢位師傅專門代客人畫符驅邪，指導如何趨吉避凶。成衣L位弟婦話每早返工就有人在門口排隊，佢負責登記、派籌、收錢及記錄，忙個不休。有如此風氣，當然係好多台灣人不信蒼生信鬼神，俾阿扁搞到冇晒信心之故。
寫到呢度，梁玳寧大姐來電話，團年最佳日子係一月三十一日星期四（年廿四），但肖鼠者不宜，跟住係二月六日星期三（年三十）。至於開工吉日，梁玳寧話係首選正月初十（二月十六日星期六）上午九時半，次選係正月初七星期三（二月十三日）上午九時半，平穩之選係正月初四星期日，與正月初五星期一，一般打工仔必然係正月初五返工㗎嘞，冇乜好揀。