日前捧走商台叱咤生力軍女歌手金獎的「翻版鄭融」李卓庭，她有句口頭禪「慢半拍恩賜」。李卓庭曾四度參加歌唱、新人及模特兒比賽，可惜全部敗陣，惟有面對現實做OL，豈料心癮發作，去年拚着家境拮据再博一鋪做歌手，終於bingo！那又何妨慢半拍？
勇奪今屆叱咤頒獎禮樂壇生力軍女歌手金獎的李卓庭，現年24歲，外貌似鄭融，星運則跟當年參加歌唱比賽出線的張學友殊途同歸，同樣在各大小歌唱比賽中屢敗屢戰，結果來自小公司的李卓庭竟撼低獲英皇大靠山撐腰的勁敵鍾舒漫，成功摘金。
抗拒選美賣肉
李卓庭說：「我成日都話自己係慢半拍恩賜。」她年紀輕輕，但人生故事豐富，源頭只因她對歌唱事業死心不息，她笑說：「我17歲參加最後一屆華星新秀歌唱比賽，又參加第一屆英皇新秀比賽，兩次都係入準決賽，跟住又參加過新星新人類選拔賽，01年又參加過model比賽，就算我返工做OL，都係一直參加比賽，我唔係為入娛樂圈，而係真係鍾意唱歌。」後來她終獲唱片監製方樹樑賞識，引薦她簽約經理人，圓其歌星夢。
李卓庭4歲學跳中國舞，她曾在無綫節目《星光熠熠耀保良》中，做周渝民的伴舞女郎，又曾分別為容祖兒的《一拍兩散》和薛凱琪的《奇洛李維斯回信》唱demo示範歌，問她為何不參加選美作為入行捷徑？她即笑說：「我個心想唱歌咋，我身材又唔好，直情係冇身材，唔會着三點式㗎。」
不過在加入樂壇前，李卓庭基於家庭經濟問題，曾作慎重考慮，她說：「因為阿爸阿媽退晒休，屋企又要供樓，要畀錢屋企，我入咗行仲冇畀錢㖭，我家姐做marketing，佢講到喊，話唔知點算，我都掙扎咗大半年時間，先至決定行呢條路。」
採訪：朱倬誼 攝影：陳慧安
場地：香辣屋@CWB
