有線電視同電盈（008）喺香港鬥得興起，你有K寶我有now，家陣戰線伸延到中東，K寶噚日公佈，同阿拉伯地區嘅私營新聞電視台──半島電視台（AlJazeera）講掂數，由呢個月16號起，K寶第34台會播放半島電視台嘅英語頻道。咁啱得咁蹺，8號仔電盈喺上個月中，亦入標競投卡塔爾固網牌照。
冇錯，一個搞電視台，一個爭固網牌，生意各有各做，冇乜衝突，不過又會咁啱齊齊進軍中東，話唔埋幾時嚟個正面衝突。不過，電盈喺卡塔爾競投嘅第二個固網牌照，要到今年4月先知中唔中標。但K寶呢單即將上映，收視得唔得好快就知。
呢個半島電視台有幾吸引？喺911之後，多次收到拉登錄影聲明嘅電視台，咪就係呢個台囉，個台96年成立，亞洲區嘅廣播中心就喺吉隆坡，一直以敢言做賣點，報道中東地區新聞，所以俾人叫做「中東的CNN」。K寶話，希望引入半島電視台可以報道引人入勝嘅頭條喎。