一年容易又過去，踏入08年，葉翠翠回望07年，多得「死敵」袁彌明帶挈，增加見報率和工作量。想起初入行冇工開的歲月，翠翠自認當時貌醜又無心工作，今年一於目標為本，主持行騷拍劇三線齊下，戴nudebra谷鬼影變幻球接job絕冇問題。
講到07年是非人物，葉翠翠和袁彌明理應孖住上打入十大。前者被嘲閒角又要賣肉養家兼樣貌身材不斷變，如今袁彌明與無綫反面，出外闖自力更生，翠翠則頻頻接騷又躍升第二女主角，與袁詠儀合作拍新劇《疑情別戀》，絕非在《溏心風暴》的霎眼閒角可比。
越忙越自豪
多得袁彌明帶挈，翠翠去年見報率和工作量齊齊上升，她說：「每個人都有自己嘅崗位，總之永遠記住要做好功課，唔使刻意做其他嘢，明眼人都睇到我嘅成績。」對於「死敵」袁彌明不住放風，翠翠自言從無因此不快，更帶點自豪地說：「我唔會放喺心上，因為實在太忙喇！食飯時間都冇，連噚日做乜嘢都要睇番時間表先記得，邊有時間諗其他嘢？」
「企定任鬧」
新劇與出名要求高、鬧人不留情的袁詠儀交手，問翠翠可擔心被罵？她說：「做得唔好就預咗俾人鬧㗎啦！我成日同監製講，如果我一做錯就嗌咪鬧，等我記住原來俾人鬧，係咁樣衰咁深入民心，下次就唔敢。如果係無理取鬧嘅，我會企定俾你鬧，總之你𠵱家鬧啦鬧啦，將來可能我已經冇晒感覺，而且以前喺英國讀書都俾人鬧慣。」
女孩子難得修煉成千呎厚臉皮，但最緊要靚。06年，翠翠當選港姐後一年，除了一星期主持兩天《娛樂直播》之外，工作量不多，她自責：「嗰陣又唔畀心機做嘢，又醜樣又冇taste，係咁跌watt，啲人梗係唔搵你啦！啲PR私底下都會傾㗎嘛，見你有口碑先會再搵番你，所以我都有檢討自己，點解冇嘢做，於是去學英文手語騎馬唱歌跳舞。」
自言醜樣的翠翠，近期上圍升cup兼容貌省鏡，惹來陣陣整容疑雲，但她卻堅稱全身無添加，她說：「我唔會介懷，最緊要靚，好多時性感都係睇場合，至於肥咗瘦咗我自己真係控制唔到，我係有戴nudebra，香港人人都有試，唔係乜嘢大秘密！」
採訪：吳佩思
攝影：葉君海
服裝：A/X（紫色裙）、BCBGIRLS（棗紅色裙）
