常言道股海升跌波濤洶湧，其實大市好淡消息亦予人感覺峯迴路轉，好似溫總嚴令遏抑通脹，電費、天然氣及成品油價格統統不得調整；長實（001）又有股東配售，之後又有陸東將港股合理值調低至28500點等，種種消息均利淡港股居多，不少散戶以為大市死梗！
好友灰心到瞓唔着時，伯南克發表偉論，潛台詞美息擺明續有得減，美股升市收場，事前睇淡者即打倒「昨日的我」改為睇好，輪到淡友腳震。
昨日港股隨美股高開，一度升過300點，忽然下半場傳出美林或要為次按減值高達150億美元，恒指瞬間由天堂重返陽間。左右大市升跌的好淡消息縱橫交錯，令純聽消息炒期指的散戶大吃苦頭！股友開始擔心，港股後市會否跌穿「雙底」支持而墮進熊市地獄？
受制於主要平均線
有散戶以為，港交所（388）係大市另類指標。港股踏入08年之後，成交量雖漸回升，近日並已超過1200億元；不過，港交所股價卻未跟升，反而自今年首個交易日至今，圖表走勢似形成下降軌，現價又受制10日、20日及50日平均線，會否先試190元支持區？如散戶不善忘，去年11月24日本欄曾提及港交所介乎157.50元上升裂口會否回補，星俠更預言如果要補，大市可能已散到面目全非。當日預測看似好長遠，然隨時日推進，如今已變得那麼近！散戶想撈港交所，應可多等一會。