「我唔死都冇用！」這句話竟然出自少男殺手JJ賈曉晨口中，確實令人驚訝。3年前JJ向父親借10萬元來港打江山，中途因轉公司坐冷板凳，盤川散盡，客串拍電影被迫與張國強攬攬錫錫，遭人兜頭扑暈後更捱罵，令她難過得想死，以為香港容不下她這個「大陸妹」，至去年終憑做味之天使上位，當下積極𢱑銀是她的新目標，谷底翻身的JJ不諱言：「唔係我現實，係呢個世界要咁現實。」
英雄莫問出處，新一代少男殺手JJ賈曉晨去年未為無綫遊戲節目《味分高下》擔任味之天使前，實情幾霉。擁有回族血統的25歲濟南姑娘JJ，3年前不理父親反對，單人匹馬來港發展，拿着父親給她的10萬元盤川闖天下，豈料因轉經理人公司發生問題，她每天只有支出沒有收入，錢花光了，剩下一殼眼淚。
俾火燒冇保險
回想那段悲愴日子，JJ接受訪問時仍感無奈，她說：「其實係做咗《美女廚房》美少女廚神之後發生嘅事，我由舊公司轉去新公司潮音樂，我想自己解決轉公司嘅問題，但我能力有限，諗番都好想喊，嗰時係覺得自己唔死都冇用，嗰段時間乜嘢都停晒，好似一下子乜都冇，冇錢、冇感情、冇工作、冇人喺身邊、冇人可以信，乜都好驚，又唔敢同屋企人講，好想自殺，日日喊，覺得人生好冇意義。」
JJ續說：「我不嬲思想好灰，成日諗嘢，香港又大又靚，但唔屬於自己，咁小嘅一個我都容唔下，好殘忍。嗰半年我一路冇乜收入，之前又貼咗錢3年，我嚟香港預咗貼錢，新人係要自己貼，所以好驚冇嘢做，爸爸畀我嗰10萬，一早已經用晒。我租住李子雄嘅物業，係因為佢係爸爸嘅朋友，爸爸會放心啲，至少有個識嘅朋友照應吓。」
初來香港時，JJ由二打六捱起，她拍電影《校墓處》飾演一個狐狸精，被大婆怒揭她勾引其丈夫後，將她活生生燒死，但前後出場不足10分鐘。JJ對扮爛面女鬼不介意，介意的是被人蝦，令她十分難過，淚灑片場。JJ說：「記得有場戲講我被火燒，我身後面有個木架，木架着咗火，我企前面，借位望埋好似被火燒緊咁，但火燒緊時我背脊好痛，我頂唔順，成個人跳咗出嚟，唔係會被燒死，原來電影公司冇買保險㗎！」
原來「好戲」在後頭，JJ說：「又有場戲講我畀人打死，有個人（工作人員）用個實心筒打我，佢真係打暈我呀，我醒咗咪喊囉，但導演一句安慰都冇，話要繼續拍，跟住又要畀個男演員（張國強）又錫又摸，我現場講咗唔想錫，好想喊，又唔敢講，惟有話換個方法，咁樣做、咁樣演得唔得？但成場人等緊我做，惟有拍啦。」
抑鬱致鬼剃頭
JJ越說越激動：「當日拍火燒戲好危險，我知我離開個着火嘅木架，一定俾人鬧，但當時有人話：『你咁唔吃得苦嘅？』點樣先係吃得苦呢？呢場係我做得最辛苦嘅戲，真係自己上陣拍，燒到好痛，拍完部戲之後，我仲鬼剃頭，所以𠵱家穩定已經好幸福，唔使特別好、特別紅。」
娛樂圈是跟紅頂白英雄地，JJ受盡白眼及欺凌，深明藝人花無百日紅，不由你不現實，她說：「每次爸爸畀錢我，我都好唔開心，以前我對錢唔注重，但人大咗，知道賺錢好重要，要交租，養家活口，唔係我現實，係呢個世界要咁現實。其實我好鍾意香港呢個地方，大家都好勤力做嘢，我一定會畀心機，希望買樓畀屋企人。」
採訪：朱倬誼 攝影：仇志德
服裝：Killah
髮型：JasonWong@XenterJet
場地：FatAngelo's@TST
