第58屆柏林影展於下月舉行，昨日大會公佈了部份入選競賽的電影名單，杜琪峯執導的《文雀》順利入圍，爭奪最高榮譽的金熊獎，男女主角任達華與林熙蕾則有機問鼎柏林影帝、影后，任達華昨日表示《文》片拍了4年有多，連戲中的單車都踩爛了，是他拍得最久的電影代表作。
杜琪峯執導的電影作品近年來不斷獲國際影展重視，繼05年他導演的《黑社會》入選康城影展後，06及07年也分別以《放．逐》和《神探》入選威尼斯影展，可惜每一次也是鎩羽而歸。踏入08年，阿杜的最新作品《文雀》獲柏林影展垂青，入選競賽部份，雖然影展於下月7日大年初一揭幕，但阿杜已準備率領主角任達華與林熙蕾同赴柏林。
大年初三揮軍德國
對於入選柏林影展，阿杜昨日接受電話訪問說：「我真係好開心，如果唔係柏林邀請呢部戲參展，我都唔知呢部戲幾時先可以拍完，部戲已經拍咗4年幾，最終因為趕住去參加呢個影展，所以終於可以幫部戲埋咗尾，呢部戲係比較輕鬆嘅題材，同之前參展嗰幾部戲係唔同風格嘅。不過揭幕嗰日係大年初一，我就想年初三先飛，希望大會可以遷就到我啦，到時任達華同林熙蕾都會同行。」
因《文雀》入圍而有份角逐柏林影帝的任達華，昨日與太太琦琦到跑馬地擔任床具用品店的開幕嘉賓，兩人更獲贈價值達20多萬的睡床。任達華對於《文雀》入圍柏林影展說：「我對部戲奪獎嘅機會相當有信心，因為呢齣戲拍咗4年幾，感覺好好，而且唔似杜生以前嘅戲種。」
唯一一個連戲演員
任達華續說：「雖然個名好沉重，但其實係好輕鬆，我仲係片中唯一一個連戲嘅人，因為喺拍攝期間有兩個演員肥咗10幾磅，所以拍佢哋時就要拍背脊，喺片中我仲踩單車踩足成4年幾，仲一次過要車埋三個人，終於踩足4年，部單車都爛埋，總之呢齣戲係我拍攝最耐嘅代表作。」
入圍今屆柏林影展競賽部份的電影，還包括內地導演王小帥執導的《左右》、日本導演山田洋次的新片《母親》、奧斯卡影帝丹尼爾路易士（DanielDay-Lewis）及導演保羅湯馬士安德遜（PaulThomasAnderson）合作的話題電影《黑金風雲》（ThereWillBeBlood）。西班牙女星彭妮露古絲（PenelopeCruz）與同鄉導演IsabelCoixet合作的美國片《Elegy》和英國導演邁克李（MikeLeigh）的《Happy-Go-Lucky》也有份入圍。完整的入圍名單，會在本月尾正式公佈。
採訪、攝影：駱華齡
第58屆柏林影展競賽部份入圍名單
片名：《Elegy》
導演：IsabelCoixet 地區：美國
片名：《黑金風雲》（ThereWillBeBlood）
導演：保羅湯馬士安德遜（PaulThomasAnderson） 地區：美國
片名：《S.O.P.StandardOperatingProcedure》
導演：ErrolMorris 地區：美國
片名：《Happy-Go-Lucky》
導演：邁克李（MikeLeigh） 地區：英國
片名：《GardensoftheNight》
導演：DamianHarris 地區：英國
片名：《Restless》
導演：AmosKollek 地區：以色列
片名：《HeartofFire》
導演：LuigiFalorni 地區：意大利
片名：《QuietChaos》
導演：AntonelloGrimaldi 地區：意大利
片名：《Julia》
導演：ErickZonca 地區：法國
片名：《LadyJane》
導演：RobertGuediguian 地區：法國
片名：《文雀》
導演：杜琪峯 地區：香港
片名：《左右》
導演：王小帥 地區：中國
片名：《母親》
導演：山田洋次 地區：日本
片名：《Hanami》
DorisDorrie 地區：德國
片名：《LakeTahoe》
導演：FernandoEimbcke 地區：墨西哥
片名：《TheEliteSquad》
導演：JosePadilha 地區：巴西
資料來源：柏林影展