好多大公司都會出版內部通訊之類嘅刊物，基本用意係增加員工歸屬感。太古（019）亦新出咗份叫《紅白藍》嘅中文版內部通訊，用免費報紙嘅小報形式，總共24版，相多字少，跟足近年主流傳媒走向。內容都離唔開講吓公司嘅活動，出賣吓員工「色相」，登佢哋啲訪問或者參與活動嘅相，好似太古香港主席白紀圖一家四口嘅便服相呀咁。
不過，太古話晒都係一間泱泱大企業，出份小報已經唔多襯身份，雖然紙質唔錯，之但係印刷認真麻麻，相片顏色灰濛濛，圖片說明又細到要用放大鏡睇……唔好意思，華華可能聽得太多報紙俾人又鋤又踩嘅評語，一時間當咗份《紅白藍》係免費報紙㖭。
發揮紅白藍袋精神
咁份內部通訊點解叫《紅白藍》呢？身任督印人嘅太古公司公共事務總經理周關美詩話，寓意係希望員工可以發揮紅白藍膠袋嘅精神，一個小小土產防水袋，都可以成為國際品牌手袋款式，所謂每人一小步，加埋就係一大步。