去年底榮升渣打集團（2888）非執行主席嘅戴維思，闊別香港傳媒已有一段時間（01年底佢由香港調升去倫敦做集團行政總裁），噚日佢重臨「發迹地」，風采更勝從前，大概𠵱家做主席唔係CEO，唔使日日追數交成績，所以望落去成個人都精神咗，後生過以前。
曾經講過好懷念香港傳媒鎂光燈嘅戴維思，做咗集團一哥後，除咗一個禮拜有兩三日，主力處理銀行相關事務外，亦兼顧好多公職同國家大事，英國首相白高敦舊年中就任後，整咗一個由二十幾位英商翹楚組成嘅商務委員會（businesscouncil），委任佢老哥做主席，直接向首相滙報，委員會嘅職責，係為英國經濟發展前景同埋挑戰出謀獻策，好似點樣維持倫敦國際金融中心地位、保持市場競爭力同創造力、培育人才呀咁。
對於幾時榮休，戴維思就話集團冇明文規定，試過最年長嘅主席，接近70歲先退下火線，佢又笑笑口咁話，自己家陣只係55歲，似乎暗示仲有排玩。