《2007年度十大勁歌金曲頒獎典禮》今晚舉行，各大獎花落誰家惹來多番揣測。昨日眾歌手出席拜神儀式，被取名張勁囂的張敬軒得古巨基及李克勤說好話，他自我解嘲謂要改名「張勁謙」。有指容祖兒會囊括最受歡迎女歌星及亞太區最受歡迎香港女歌星獎，不過對手楊千嬅卻謂她與祖兒機會各半。
無綫舉辦的《2007年度十大勁歌金曲頒獎典禮》昨於紅館舉行拜神儀式，眾歌手包括古巨基、李克勤、張敬軒、容祖兒、何韻詩及楊千嬅等都有出席。張敬軒被指未紅先驕遭取名張勁囂，軒仔昨日面對古巨基及李克勤等一線歌手時，三人有傾有講，軒仔笑言自己要改名張勁謙。
千嬅：唔嫌獎多
基仔則為軒仔講好說話，他說：「軒仔頭先同我影完合照話好驚唔知大家會寫啲乜，我叫佢放心，我明白發生乜嘢事。」克勤笑言軒仔要二揀一，他說：「軒仔要知道呢條係必經之路，𠵱家佢有兩個方向，一係就好似Eason（陳奕迅）咁有態度咁寸，一係就好似我咁俾人話係世界仔面面俱圓。」
至於亞太區最受歡迎香港女歌星之爭，焦點放在祖兒及千嬅身上，千嬅說：「我唔會嫌獎多，亞太女歌星呢個獎都係人生一個目標，我睇好祖兒同我都係五十五十，一半睇天，一半靠努力。」不過祖兒就聲稱沒有想過同時奪得亞太區最受歡迎香港女歌星及最受歡迎女歌星獎，她說：「我覺得如果可以五年攞最受歡迎女歌星獎係歷史性一刻，不過亞太女歌星都唔好忽視Twins。」
克勤撐林峯入圍
無綫安排所有歌手拜完神後到場內合照，不過金牌就只有小肥留下，金牌發言人陳小姐事後表示基仔不知道有此安排，鄧麗欣及側田就有工作在身。在合照時祖兒見到主持之一的曾志偉表現避忌，經常站在千嬅身旁。另外，頒獎禮共頒發44個獎，不過對於身為新人的林峯入圍最受歡迎男歌手五強，克勤大讚林峯有實力：「大家唔好拎佢嚟開刀，佢係一個有實力嘅歌手。」基仔則認為五強是投票選出的，故林峯是實至名歸。
採訪：楊潔雯、李珮洳
攝影：陳順禎