「玲玲出嚟又睇掌喇，農夫今年又攞獎喇！」
鼠年將至，麥玲玲的睇相生意當然多得應接不暇，農夫也當然希望得獎可以多到拿不完。
早前在商台頒獎禮打低Twins捧走兩個組合大獎，豬年應該是農夫的行運豐收年，知名度與收入均節節上升。
一命二運三風水，無論麥玲玲掂不掂，農夫已邁向風生水起，至少明年頒獎禮不用再坐在側田的側面了吧？
撰文：胡比
陸永加C君等於農夫，他們是饒舌組合，07年成功打入樂迷心中，在商台叱咤頒獎禮上得到組合金獎，不過仍然有不少人以為他們是新人，其實農夫入行已7年，他們表示今年才覺得自己是屬於這個娛樂圈，終於有人知道誰是農夫，為何起名農夫？他們有兩個說法，首先是因為中國以農立國，他們想當樂壇的農夫，在樂壇散播音樂的種子；其次是比較貼近現實，話說有一天，他們和朋友在街上閒逛，看見街上途人闊褲單邊摺腳的HipHop打扮有如農夫，忍不住取笑一番，然後二人腦袋忽爾叮一聲，決定組合就取名農夫，易記又夠草根。
相遇 HipHop互鬧成知心
農夫相識於微時，二人讀同一中學，陸永大C君兩年，大家在一個課外活動中認識，陸永當時教C君做話劇，陸永用LMF其中一首歌的歌詞鬧C君，C君回他另一句歌詞，自此二人成為好友，陸永形容：「當時真係好似他鄉遇故知咁，好開心，跟住我哋就同幾個朋友組咗隊band，都係唱rap。」後來還曾在歌唱比賽中得青少年組冠軍。
也因為那次比賽，陸永與C君被一間專做地下樂隊的公司垂青，農夫便從此成立，推出過一張大碟，也只是玩票性質，直到在一次表演中遇上他們的伯樂DJTommy。陸永憶述：「嗰時DJTommy都係自己搞公司，佢簽咗我哋之後，出咗一張EP同一張大碟，嗰時佢真係一腳踢，宣傳、派台、會計、司機，講得出嘅工作位置都做晒，我哋真係好感激佢。」
推出大碟《音樂大亨》時是他們生活最困難的時期，陸永謂：「我當時仲讀緊第二年演藝，做碟同錄音都好忙，因為啲歌由我哋自己創作，根本就唔夠時間，最後我就冇再讀書，咁唔讀書都要生活㗎，咪去啲中學教吓人做話劇，有時仲會做埋老臨（臨時演員），賺吓生活費，金晒毛做阿sir囉。」
搭車 偷用特惠真有其事
最近農夫二人被問得最多的問題不是得獎感受，而是麥玲玲是否陸永的親生媽媽？C君跟麥玲玲學風水，是否擺了個得獎風水陣，陸永澄清：「麥玲玲唔係我阿媽，可能我喺頒獎禮上多謝阿媽幫我rap過首歌，所以令大家誤會，其實我阿媽幫我rap嗰首歌係《456wing》，唔係《風生水起》。」C君也強調：「我係跟麥玲玲學風水，不過只係為興趣，邊有攞獎陣㗎，連師傅（麥玲玲）都話冇得擺啦。」
談到陸永母親的rap歌，陸媽媽rap道：「堅持，堅持，幾多錢一茶匙吖？你都咁大個仔啦，有乜謂窮到日日搭地鐵偷雞用特惠。」輪到陸永rap：「但我堅持，我堅持，到有一日俾地鐵罰咗五百元，喺嗰一刻我諗我終於明白有啲嘢我堅持再撐都冇法，我冇再堅持偷用學生飛入閘，但我堅持到呢一刻做hiphop」，陸永說這是真人真事，他笑謂：「我計過我雖然俾地鐵罰咗500蚊，不過我應該都有賺。」
家人 Band騷再嘈都照睇
C君爸爸在兩年前去世，他自言喜歡HipHop是因為爸爸的影響：「我阿爸英文唔叻，但係佢以前淨係聽MichealJackson同Madonna嘅歌，呢啲歌入面都有唔少rap，我細個就係聽呢啲歌大，本來屋企環境唔係太差，所以一直都唔使點理可以玩音樂，到阿爸唔喺度之後，屋企冇咗經濟支柱，層樓變咗負資產，差啲要破產，所以當時就一定要做嘢，阿爸在生時都會去睇我做騷，佢真係好支持我。」
C君本來有份正職，在雜誌社做撰稿人，但最後都要放棄這份工作，全心做碟，他謂：「嗰陣返朝9晚5，一放工就要錄音，每日只瞓得兩個鐘，真係頂唔順，惟有放棄份工，專心做碟。」二人都很堅持做hiphop音樂，這份堅持背後，是得到陸永媽媽與C君爸爸的支持，陸永說：「屋企得我一粒仔，冇兄弟姊妹，又唔係有錢人，個仔話要玩音樂，仲要支持到睇我做band騷，嘈到不得了都要去睇，仲會畀意見，𠵱家賺到少少錢，可以回報番佢，都仲算有啲安慰。」
Edison 不干預創作好老闆
農夫自言非常幸運，一直以來有不少人相助，很多歌都有人為他們featuring，有的是他們邀請，有的是別人主動找他們，頓時相識滿天下，好像拍攝當日便在街上巧遇陳永陸（陸叔），本來互不相干，就只因為他們在《全民皆估》中採用了陸叔一段說話，陸叔本人也覺得很有趣，便主動找他們看看將來有否合作機會，自此變成好友。
農夫老闆陳冠希（Edison）近年也曾出rap歌大碟，但成績未如農夫般理想，二人有否感到「妹仔大過主人婆」呢？陸永說：「雖然Edison成日同人講我哋攞獎多過佢，不過佢都係講笑，其實佢份人好謙虛，成日踩自己抬高人，不過我哋點都追唔到佢，淨係睇本紅簿仔就知啦。」二人對這位老闆有讚冇彈，包括給他們很大的自由度，從不干預他們的創作，也不會刻意要他們順從他。
有人覺得陸永的聲線與林海峰非常相似，他自己覺得：「好多人都咁講，我覺得我同C君兩把聲加埋先係最似。」他們喜歡軟硬，但自稱音樂未受影響，可能農夫草根，大家才對他們的歌特別有共鳴，C君坦言：「其實rap係好難做同冇得做，因為香港冇呢種文化，我哋希望多啲人玩rap，可以將rap變成流行曲。」
攝影：仇志德
人物誌：唱HipHop反映時弊
在商台頒獎禮勇奪叱咤樂壇組合金獎的農夫（FAMA），於2000年成立，成員包括鄭詩君（C君）及陸永權（6wing）。農夫的歌有別主流音樂，歌曲以hiphop為主，歌詞內容輕鬆幽默，也反映時弊。農夫前年憑歌曲《456wing》聲名大噪，知名度與日俱增。去年農夫找來麥玲玲rap《風生水起》，歌曲更唱至街知巷聞。此外，6wing與唐寧的緋聞曾被廣泛討論，至於C君則是麥玲玲的徒弟。
話你知：歌詞抵死言之有物
農夫某些rap歌的歌詞抵死啜核，有諷刺時弊、也有夫子自道。
歌名：《全民皆估》
歌詞：投機最好全港靠賭，由今朝早要撈變到唔使再撈
詮釋：諷刺香港市民陷入炒股熱
歌名：《學海無涯》
歌詞：啲功課一係就抄一係唔交……讀書為咗識字為咗沙紙定係為咗我老媽子
詮釋：諷刺學生讀書風氣敗壞
歌名：《風生水起》
歌詞：玲玲出嚟又睇掌喇，農夫今年又攞獎喇
詮釋：玲玲料到農夫會攞獎？
歌詞：我哋坐喺側田嘅側面側面側面側過側田
詮釋：自嘲地位低微，又不忘拿側田開玩笑
歌詞：人踢波時我又踢波，但係點解人哋踢皇馬我就踢南華
詮釋：諷刺香港足球員冇出息
歌名：《八無禁忌》
歌詞：楊千嬅唔妥唐寧唔妥我
詮釋：歌詞辣到6Wing舊愛唐寧，似意有所指
歌詞：張敬軒原來係黑人，你睇佢眼下面有兩個黑印，我哋調查過佢點解咁高音，關鍵係咪喺佢下半身
詮釋：暗寸張敬軒的黑眼圈及性取向
歌名：《456Wing》
歌詞：我rap到深造我rap到乜都冇做我rap到我戶口變到雙位數
詮釋：描寫6Wing真人真事
歌名：《愛似陳冠希》
歌詞：但係𠵱家我女友真係一啲都唔錯，唔要銀紙唔要Dior，淨係想成日攬住我
詮釋：讚陳冠希女友Vincy講心唔講金，不似其舊愛開口埋口要名牌