陳慧嫻再度活躍於樂壇的第一擊，並不是計劃在紅館舉行個唱，反而準備在農曆新年期間舉行慈善音樂會，大唱其他歌手的歌，早前更特別為音樂會影宣傳海報。慧嫻表示唱慈善騷別具意義，希望代表一個好的開始。
很多歌手希望在紅館開騷，再度復出的陳慧嫻也不例外。但她復出的第一炮，反而是下月為糖尿病基金會「活出生命」於九龍灣展貿舉行的慈善音樂會。慧嫻日前為音樂會到柴灣影宣傳海報，她在影樓聽攝影師講述影相時用的服裝，又與同事商討個唱內容。
雖然個唱未必及紅館的大製作，但慧嫻說：「我好想做善事，但又唔想簡單捐錢嗰隻，𠵱家唱慈善騷好好。而且係新年唱，覺得好有意義，希望真係代表到我有一個好嘅開始。」
秉承學友傳統
慧嫻出名是唱家班，但她表示今次會有一定難度，因為屆時主要獻唱別人的歌，她說：「之前呢個會搵張學友唱騷，都係唱別人的歌。我都會承接呢一個傳統，所以大部份嘅歌都係人哋嘅。但我唔係一個易記歌詞嘅人，一個月內記幾十首歌都幾難。」演唱會中的歌是慧嫻欣賞的作品，種類很多，讓觀眾有大驚喜，她說：「估我會唱嘅我偏唔唱，我會唱周杰倫、容祖兒、鄭秀文、衞蘭、鄧麗欣等人嘅歌，𠵱家諗緊可能唱一首我嘅新歌。」
九展開四面台
另外，慧嫻原打算在紅館修館前，申請在6月舉行個唱，但一波幾折，她說：「紅館本身批咗兩星期畀Kelly（陳慧琳），政府話放一星期畀我，點知最後又收番，所以我未必喺裝修前搞到騷。或者我再開騷，會先喺內地搞。」
在紅館搞騷暫時未必有望，但慧嫻已打算把經常被觀眾投訴座位的九展變成紅館，她說：「我有諗過將個場變成四面台，但座位可能少咗，𠵱家同大會傾緊。」
採訪：王連連
攝影：陳慧安