北角阿Ben噚日打上嚟，推介鋼鐵股馬鞍山鋼鐵（323），佢話：「呢排資源股熱炒，逐隻輪住嚟，輪都輪到鋼鐵股啩！」阿Ben建議現價買入，短炒1個月，目標價6蚊，睇升11.5%。馬鋼噚日跟大市跌，收報5.38蚊，跌1.1%，較去年10月初9.08蚊歷史高位，大幅回落四成一。
敦沛金融投資研究部主管郭家耀表示：「炒資源股都要分上、中、下游業務，大陸鋼鐵股唔從事上游業務，要買鐵砂返嚟生產鋼材，原材料價格上升，會增加經營成本，對鋼鐵股非常不利。舊年年底鋼鐵股就跌咗好多，馬鋼主要生產質素較低嘅鋼材，門檻較低，面對唔少同行競爭。」
阿Ben回應：「仲諗住順住炒，升完黃金，跟住到隻江西銅業（358），應該到鋼鐵股有機，原來唔係咁睇。」郭家耀話：「個市好旺嘅時候，呢個炒法係得嘅。」
鐵路客車輪市佔率90%
Ben再追問郭家耀：「論質素，鞍鋼（347）係咪好過馬鋼？」郭家耀解釋：「鞍鋼有競爭優勢，生產嘅係高質素鋼材，較少競爭對手，要揀鋼鐵股，不如選鞍鋼。」
事實上，馬鋼係內地火車輪生產嘅龍頭企業，喺鐵路客車輪方面嘅市場佔有率高達90%，貨車輪亦佔超過五成，同鞍鋼嘅汽車板、高速重軌、石油管等主要產品，目標客戶唔同，未來邊隻跑出，拭目以待。
《Ben建議》
建議買入價：$5.38
目標價：$6
止蝕價：$5
時間：一個月
起鐵路要鋼材 買鞍鋼
大埔關公噚日選鞍鋼（347），推介原因，並非阿Ben所講嘅輪住炒資源股，而係睇好基建概念，佢建議現價買入，目標價25蚊。鞍鋼噚日收市報21.65蚊，跌0.69%。
關公話：「內地大搞基建，要起唔少鐵路，咁就需要大量鋼鐵，對鋼鐵股股價應該有幫助。」郭家耀話：「從基建需求程度分析，市場對鋼鐵有一定需求，揀鞍鋼係一個正確選擇。」
關公補充：「舊年鞍鋼嘅股價跌，可能係受出口關稅影響，家陣睇番，對佢影響應該唔係太大。」郭家耀指出：「其實國內都唔係咁鼓勵出口，煉鋼污染大，再拎去出口，會浪費資源，所以大陸鋼鐵股都係以內需為主。」孫柏文就話：「19蚊止蝕價set得幾靚，鞍鋼喺20蚊企得幾穩，如果真係穿咗，就會跌得幾急。」郭家耀亦話：「個市好番，鞍鋼有機會上到25蚊目標價。」
《關公建議》
建議買入價：$21.65
目標價：$25
止蝕價：$19
時間：半年
長江實業（001）
不怕抽水 還是你最好
西貢黃先生推介長江實業（001），佢提到噚日有報道話有股東配售長實股份，搞到長實跌咗成3.4%，黃生覺得現價可吸納，目標價150蚊，睇3個月。
長實噚日收報141蚊，配售消息亦拖累埋其他地產股齊齊插水。郭家耀話：「地產股中，長實未必係最好嗰隻，佢嘅地產概念比較薄弱，炒地產股呢一個浪，長實好明顯落後新地（016），如果要揀，不如揀最強嘅新地，如果你都係睇10%回報，新地都可以俾到呢個回報你。」孫柏文話，九倉（004）作為一隻收租股，喺租金升，但利息下跌情況下，槓桿效應加大，算係一個唔錯選擇。
不過，黃生仍然堅持睇好長實，原因係「炒減息，樓市供應又少，現價入點都有水位。」
《黃先生建議》
建議買入價：$141
目標價：$150
止蝕價：－
時間：3個月
香港建設（190）
坐貨七年 望返家鄉
旺角成哥推介香港建設（190），原來佢早喺7、8年前已經買落，入貨價仲成3.7蚊，佢認為隻股有機會上番4、5蚊，點知舊年7月見過3.86蚊之後，一直喺兩蚊上落。香港建設噚日收報1.98蚊，跌1%。
郭家耀話：「香港建設主要做建築，近幾年大家都見到冇乜基建，所以佢嘅股價都跌得幾犀利，之前上過三個幾，應該係同佢發展內地房地產有關，近排佢亦都跟隨其他內房股一齊跌。」孫柏文問成哥：「點解舊年見家鄉嘅時候唔放？」成哥話：「我見佢有基金入股，又話風力發電，仲搞埋房地產。」
郭家耀分析，「香港建設本身土儲唔係好多，佢係一間比較細嘅公司，點樣去增加土儲係一個問題。」
《成哥個案》
買入價：$3.70
目標價：$4-5
止蝕價：－
時間：－
世紀陽光（8276）
股海初哥 人買我又買
牛頭角陳先生推介世紀陽光（8276），上個月佢喺0.49蚊買入，既冇目標價，又唔定止蝕價，自言冇乜炒股經驗嘅陳生話：「朋友介紹買世紀陽光，係因為世紀陽光轉咗老闆。」
郭家耀話：「間公司主要做化肥，上年喺兩個幾跌番落嚟，係因為世紀陽光用咗一半資本喺內地起廠房，點知過唔到環保條例，俾中央cut咗。佢嘅盈利前景完全改晒，搞到要發盈警，加埋溫總啱啱出台嘅政策，加價能力有限，但係佢嘅成本又係咁增加。」
陳生聽完，打算7毫子就走，轉睇永義實業（616），郭家耀建議：「啱啱學炒股，唔好考慮呢啲細價股，炒呢啲要做好多功課，呢隻股冇盈利冇股息，你可以考慮番啲大價股先。」
《陳先生個案》
買入價：$0.49
目標價：－
止蝕價：－
時間：－
每日收市後4:30pm
歡迎Phonein28698262
http://appleactionews.com/features/finance/
想搵名家教路，請登入 http://appledaily.atnext.com/jp/finance登記
成功參與節目者，有機會獲贈禮品，登記成為「Webcam之友」，更有機會獲得（aastocks）即時報價賬戶
*下午3時半開始，優先接受登記
