楊千嬅與任職公關的富家子丁子高緋聞鬧得熱烘烘，更有指兩人婚期定於10月，前晚丁子高在公司搞的活動上，開腔否認婚訊，更死撐說：「由頭到尾冇戀情！」千嬅昨日被問及婚訊時，也同樣否認，更強調沒有結婚對象，她更表示母親被記者問及此事時，嚇到血壓飆升。
楊千嬅與丁子高早前傳出10月婚訊後，兩人夾口供指「唔係事實唔回應」。前晚，丁子高公關公司負責搞RogerDubuis腕錶酒會，丁子高戴上50萬元的新錶宣傳，更罕有滔滔不絕大談與千緋的緋聞。一提婚訊，丁子高即說：「首先我要澄清，唔係事實唔需要作任何回應，我一直以嚟，都唔回應咁多同千嬅嘅嘢，因為清者自清，唔想多講，但近來真係炒作得越嚟越多。」
「神女唔係千嬅」
問丁子高是否不想戀情太高調，他斬釘截鐵說：「由頭到尾冇戀情，係大家炒作，希望傳媒朋友唔好理會呢啲炒作嘅新聞。」再追問他10月婚期？他即說：「日久見人心，大家用對眼自己睇清楚發生乜嘢事。」現在兩人是戀人還是朋友？他說：「係朋友，一路都冇關係，係朋友啫。」他表示現階段朋友關係，比發展機會更重要，問他可是神女有心，襄王無夢？丁子高說：「冇咁嚴重，神女應該唔係千嬅，佢係我好朋友。」
千嬅與丁子高曾被指去年結伴赴日旅遊，聖誕期間，千嬅更上丁的寓所打邊爐兼過夜，關係非比尋常。丁子高死撐說：「嗰次係聖誕聚會，好多朋友、我父母、千嬅都一齊玩，唔係見家長，父母見到我嘅朋友係唔出奇。」千嬅是否過夜？他說：「冇，好離譜，千嬅嗰晚11點就同我契嫂走咗。」他又指欣賞千嬅作為一個藝人，做朋友的性格也OK。
丁子高一向花弗，曾經與不少女藝人傳緋聞，問他可是不想為一棵樹放棄成個森林？他對此說：「識我嘅朋友都知我好耐冇拍拖，大家用對眼去睇啦，真相唔係聽返嚟。」他更指自己是專一的人，從無一腳踏兩船。
仍以事業為重
千嬅昨日則到紅館出席《2007年度十大勁歌金曲頒獎典禮》拜神儀式，
對於近日有報道指她即將與丁子高結婚，她邊笑邊澄清說：「九唔搭八，睇到篇報道醒晒啦，勁過我食一包退燒藥連說明書，即時好番晒呀，總之10年內我都睇唔到自己會結婚。」她又笑言自己十分享受做明星，所以現時都是事業為重。
問到男友求婚的話，千嬅會否答應，她說：「結婚對象都未有，嫁風咩，總之我最憎人搞我屋企人，我阿媽嗰日俾人問完之後，嚇到血壓高。」
另一方面，有報道指千嬅不滿老闆黎明為她揀歌，故下張碟會自己擔任監製，她說：「黎生佢老人家忙緊拍戲，但佢都有開始同我傾新碟，凡事都會有適應期，我覺得佢幫我揀啲歌好好呀。」
採訪：顏英儀、李珮洳
攝影：葉君海、陳順禎
