繼日前中央嚴禁電價調升之後，電力股再有壞消息，據內地報章《第一財經日報》報道，華電國際（1071）母公司華電集團，旗下貴州、四川及雲南等地的部份發電機組，日前因煤炭供應不足而被迫停產。
華電集團已向該內地報章證實，旗下位於貴州的一家發電廠，其4台30萬千瓦機組之其中一台，因煤炭供應不足暫停發電。據估計，一台30萬千瓦的機組，如果滿負荷發電，一小時發電30萬度，市價一度電0.3元，成本大概0.2元，如果按此計算，該機組停發電一天，集團就會損失70多萬元人民幣。
經營環境轉惡劣
據該報引述華電稱，今年莫講話利潤，能不虧損已經好唔錯，反映行業前景相當之灰，事實上電費又唔准加，煤價卻係咁升兼無貨，呢行隨時步煉油業後塵，發電越多蝕得越甘。華電集團被迫暫停發電，據稱原因是絕大部份煤炭要靠煤企提供，煤企唔夠貨都無辦法，因此電廠近期流行買煤礦。
以上消息，其中一樣令人奇怪之處，係貴州實際上乃煤礦豐富之地，恒鼎實業（1393）早前宣佈斥資3.55億元人民幣收購的3個煤礦，就全部位於貴州，如今連產煤豐富嘅貴州唔夠煤供應畀電廠，究竟係乜嘢原因？
據國內報章分析，煤供不應求已成未來趨勢，首先在高油價背景下，煤化工的發展前景巨大，對煤炭的消費需求將產生根本性的重大影響。其次，煤炭行業整合令大量小型煤礦關閉，中央原計劃3年內關閉煤礦11618座，但截至2007年11月底已經關閉了10412座礦井，連同非法煤礦，數目更不止於此。香港電費奇高，市民自然識得慳電，國內電費平，反而唔係好事，若內地電價長期被壓低，等於對電力股判死刑。