福隆新街百多年前是澳門的煙花之地，「財色」之士尋訪的花街。隨今時今日澳門的旅遊發展，福隆新街這條老街被重新包裝，雞飛狗走後，已由另一批「當紅阿姐」進駐，發揮福隆的「味」力，每日以真材實料真功夫，為客人做足三五七味，帶來與別不同的滿足。
記者：盧家蕙
攝影：陳盛臣
Model：Vene@TheGroup
第一招
母女愛心熬翅
約半年前這條街還是一條破落的小陋巷，因為經修路翻新，一家家食肆遷入後，最近去到的感覺已煥然一新，「阿三靚翅」就是其中一家，由舊址新填巷進駐福隆新街新店將近半年，以平食靚翅作招徠，生意滔滔。老闆娘歐陽鳳儀說：「我哋啲金針翅，足4両好靚，足夠分六碗，一千蚊唔使。我同囡囡去香港山頂鋸塊牛扒仔，都要五百幾蚊啦！」囡囡也幫口說：「自從搬了新舖，多了大批香港人、大陸豪客，佢哋過嚟贏咗大錢，鍾意嚟呢度食雞煲翅，因為貪我哋魚翅夠足料，湯又甜，唔少人試過一次後，都會再訂枱來幫襯。」
沒有酒店級華麗裝潢，也沒有俊男美女的侍應，只有忙到一腳踢的兩母女，單憑真材實料真功夫已夠撐：「我哋一手一腳自己熬湯煲翅，用豬骨湯把亁翅熬成濕翅，如此繁複的工序，第二間絕對唔做，而且更唔加任何化學劑令魚翅發粗，一定足秤。」
海洋金針翅MOP950
原隻肥雞加上足4両一梳梳粗身的金針翅，入味有咬口，全靠極之濃郁湯底及嫩滑鮮雞，一鍋可分5至6碗，魚翅迫滿小碗如吃米粉般滿足！
古法雞蛋焗鯇魚腸MOP48
帶點微焦雞蛋軟滑不嚡口，魚腸肥美滑溜，炸油條既有蛋香又有魚香，外脆內軟，加上點點果皮的甘香，更添美味。
椒鹽瀨尿蝦時價MOP15/両約MOP300
每隻有前臂般長的瀨尿蝦，足足成斤重，大大隻很有咬口，絕不比西貢的貴海鮮遜色。
原盅煲仔鹽焗蟹MOP150
兩隻奄仔蟹差不多8両重，蟹膏頗多，呈淡黃色，鮮甜又肥美。
阿三靚翅
電話：（853）28355867
地址：澳門福隆新街44-46號
營業時間：12-4pm，6-12pm
第二招
生滾糖水
拍攝當日，甜杏園甫開店，小記即拉大隊闖入，以為做首批客人，點知芳姐話：「我有15個外賣趕住整，等一陣！」堂食食客走一個，入兩個，短短半小時已坐滿，電單車友又急住叫外賣，忙到芳姐團團轉。「已經下午3點開店，都要做到凌晨3點先收得工，好多外賣呀！呢度啲人鍾意食生滾糖水，一落單就要即滾，我無煲定一大煲，包保新鮮即製，仲有湯圓餡、糖不甩同埋外面啲花生碎都係我親手整。」芳姐的「廚房」位於門口，對住4個爐頭，一手不停攪住糖水免黐底，另一手又顧住撈湯圓，又要睇住火候，絕對要一眼關七，好功夫。
合桃糊MOP16
不會很黏稠，滑溜感十足，建議跟杏仁茶配着吃，混在一起一白一啡更好吃，香甜又補腎。
糖不甩MOP12
理想的糖不甩，湯圓要煙韌，蘸上的花生碎和芝麻不會甩掉，亦不會互相黏在一起。
食客有SAY：香港旅客蔡氏一家
（左上）大佬：「杏仁茶好滑值得再食。」（左下）小妹：「糖不甩花生芝麻炒得好香。」（右上）Mance：「杏仁茶比西苑好吃，甜度適中！」（右下）大妹：「最啱食完煎炸嘢後潤番吓。」
甜杏園
電話：（853）28372435
地址：澳門福隆新街42號
營業時間：3pm-3am
第三招
魚魚得湯水
兩年前由香港踩入澳門的「火龍湯」，最近細舖搬大舖，搬近兩個月，改名為「火龍媽媽」，伙頭大將軍阿聲說：「多得香港傳媒及旅遊書的報道，加上越來越多食客睇網上討論區，好多人話睇到地道澳人大讚後，就摸上來試一試。」此店的鎮店之寶是火龍湯，其實就是以大量紅蝦、蟹及魚肉烹調而成的海鮮湯底，由於澳門海鮮供應充裕且新鮮，海鮮做主打自然有優勢。「火龍」渾身火辣辣的意味，但實際上湯底以清淡、少油、少鹽作賣點。
阿聲說創業初期，小店位置偏僻，澳門人對新事物較慢熱，故花了近一年時間爭取民心：「對港人來說，足料海鮮湯底，廿幾三十蚊食一碗麵都抵；不過澳門人就覺得偏貴，加上口味太新奇，未必接受，捱咗成年幾，總算口碑唔錯，有點成績，未來大計，就是希望『火龍湯米線』躋身成為澳門的特色美食之一！」
鮮帶子手打烏冬MOP36
招牌火龍海鮮湯底，甜美而香濃，加入粒粒酸甜雪菜及番茄，香味更突出；烏冬乃日本手打靚貨，爽滑彈牙，吃完不覺油膩飽滯。
鴛鴦米蟶子魚湯泡飯MOP33
紅糙米及白米混合起來的泡飯，湯底以鳳尾魚及九棍魚熬製而成，入口很鮮甜味美，飽肚又健康。
懷舊上湯蟹煎米粉底MOP78（細）
兩面黃的煎米粉底則買少見少，外脆內煙韌，蘸上濃郁的上湯蟹汁伴吃口味更佳。
炸生蠔MOP38
飽滿肥生蠔，脆漿不會太厚，入口脆且鮮美，MOP38有6大隻，非常抵食。
食客有SAY：
香港旅客森哥：「我真係飲晒成碗湯底！唔口渴，好夠鮮味，一定再來幫襯。」
大陸旅客張小姐：「海鮮份量很多，價錢還合理，味道還好。」
火龍媽媽
電話：（853）28939929
地址：澳門福隆新街51號
營業時間：12-4pm，6-11:30pm
（逢星期一休息）