唔似Honda，Yamaha淨係搞音樂同電單車，冇搞四個轆。不過身為全球數一數二品牌，Yamaha跑車有神級R1，綿羊有通街都係嘅Majesty，絕對夠料撐住個Y字頭。
踏入08年，Yamaha新車大軍由兇獸R6帶頭殺到嚟香港。嘩！來勢洶洶場面壯觀，你睇，應長就長、應大則大——當然講緊個車身喇，加埋歐陸式格仔皮Seat，坐上去嗰種超舒服承托感，真係連鬼妹都大叫Kimochii！
文：嘴嚼爺
攝影：梁細權
Model：Creamy
Maxam系列得個樣
唔好以為我踩今日呢架MaxamCP250，須知道呢個世界上好多唔等使嘅嘢都深得民心。先鳴謝舊同事M先生借出愛駒影相，如果唔係大家未必見到今日呢張球來球往嘅誘人噴血相。講番M先生，佢就係嗰啲不求實際齋睇外表嘅人辦喇。點唔實際呢？牛龜咁大部只有250c.c.，快極有限，咪睇佢又闊又大，實情椅底只可放一頂頭盔，尾箱連地盤佬安全帽都未必塞得入。
咁個樣呢？座位夠低舒服到似揸巡航車，而且勁長座椅配埋純白格仔皮，再襯以紅色車邊，好鬼歐陸家具Feel，有Taste得嚟亦軟硬適中，前後座一樣坐得舒服，毋須辛辛苦苦扮《天若有情》，二人同車一樣可浪漫到底。
短風擋電鍍手把LED尾燈原裝跟車，日本關西地區勁紅，㗎仔勁改，直接挑戰Fusion250普及程度，所以最得就係個樣！
高速行車超穩定
雖未配備Keyless無匙系統，亦不設加減波，但拼埋競敵Fusion身邊，已算新科技，贏咗。筆者厚着臉皮地嗌M先生載我兜番轉，終於發現最大好處；勁闊勁長車身行高速穩定得交關，完全冇其他綿羊輕飄飄嘅化學感覺，令人忍唔住大叫：嗄！嗄！總要定！
最後講講，佢呢架車加咗啲改裝料係原裝車冇嘅，好似火燄紋金屬腳踏同銀白扭油筒。不過聽講08年新版又有新搞作喎，就係𠵱家車身嘅黑色櫳位都可以跟番車身顏色，M先生話問過街價，搵人噴都要兩千幾銀㗎，當然，08年新車價位都會升番少少……
a.車頭短擋風玻璃冇乜用處不過幾好睇，車頭線條就似粒子彈仔。
b.車主因泊街被人𠝹爛原裝Seat位，所以包上呢隻白色夾綿格仔皮，港料手工千四蚊，都幾鬼貴。
c.原裝又係黑膠腳踏，車主又屎忽痕換咗金屬腳踏，上面有火燄紋幾靚，不過好污糟，唔該洗車。
d.尾箱極細，放車冚都要大力塞。
e.座椅下以為放到兩個頭盔，實際只放到一個FullFace加少少雜物。
f.要鬧，08年款都仲未加入Keyless功能，輸咗比同廠嘅Majesty。
g.電鍍金屬Brake油壺連牛角係最新加裝嘅，千幾蚊令手把冇咁齋。
h.原裝買返嚟首要係換喉，因為實在醜得緊要，而且好靜。
MaxamCP250
引擎：249CC四衝程水冷單汽缸DOHC
馬力：20ps/7,500rpm
扭力：2.1kgm/5,000rpm
傳動：CVT無段變速
體積：2,365×825×1,050mm
查詢：萬里達車行（26122218）
廠徽原來係音叉
Yamaha有電單車又有鋼琴樂器音響，到底有無關係呢？原來YamahaMotor即山葉發動機株式會社，於1955年由日本樂器製造株式會社總裁川上源一創立，而電單車廠徽，原來就係三個音叉，也象徵音樂三元素：旋律、和聲和節奏之間的協調與和諧。
玩樂器起家
YAMAHA品牌起源於創始者山葉寅楠的姓，在1888年山葉先生在濱松成立山葉風琴製造所，而在1897年正式成立日本樂器製造株式會社。而在1987年，公司100周年紀念，才正式改名為山葉株式會社。
R1飆上300km/h？
R1係Yamaha旗艦跑車，喺YouTube就有段據稱在德國公路用R1飆車嘅片段。起圍狂加速車頭都起埋，快快慢慢一段後，速度錶狂升至近300km/h！但睇畫面唔覺咁快，而且減速至170km/h時路旁私家車仔居然可拍住行，令人不禁生疑。
網址： http://www.youtube.com/watch?v=KqcdtsQpKrQ
