想起舊時住沙田，常常踏單車經過城門河，至今還記得那股河水的濃烈味道，但搬出巿區多年，不禁懷念那段踏單車的日子。所以決定帶埋家中大小寶貝來個單車遊，順道看看漁村風情，阿女仲跳埋上船扮漁家女，全家開開心心玩成日。
記者：劉明慧
攝影：梁細權
Model：Jacky、Christy、Charlie@PureModels
11:00am
第一站 租單車要講究
要單車遊，先要租單車，如不知怎樣選合適的車，單車師傅阿豪立即醒咗幾個揀車貼士，還建議女生可以揀U形蝴蝶頭單車，而男生就可揀爬山或公路車，速度快，上斜坡亦較輕鬆。
寶華三公司（26030498）
地址： 沙田中央公園單車亭3號
價錢： 小童$15-$20/hr、
成人$20-$25/hr，全日$50-$70
交通： 港鐵沙田站步行約7分鐘
小貼士
記得租埋單車鎖，一條可以鎖3架單車，價錢約全日$10。記得問清楚還車地點，可否在大美督、大埔交車。
揀車須知
1.檢查前後煞車掣、轉波掣和車鈴操作是否順暢。
2.檢查座椅高度，小朋友腳要掂地，腳踏放到最低時腿可以伸直。
3.看看輪胎是否夠氣，胎紋有否磨損。
4.小朋友最好佩戴頭盔、護踭及護膝。
12:00nn
第二站 肥陳食晏
踩到過了水警總部，阿女說肚餓，我們便停一停先食午餐，如果有看過由容祖兒及陳奕迅主演的《魂魄唔齊》，就必定對「肥陳」這艘船有深刻印象！船上有簡單小食、公仔麵同汽水，踩累了歇一歇，感覺特別有風味。
2:00pm
第三站 漫步科學園
食飽，再出發，來到吐露港路段，經過科學園，這裏有很多新落成的建築物，一去到廣場，我同囡囡就謀殺了不少菲林，而且單車徑在3年前修改過，比以前寬闊得多。
3:00pm
第四站 水陸墟體驗漁民風
離開了科學園，便往大埔方向進發，去到大埔海濱公園的最盡頭，發現了一個像是嘉年華的活動，詢問下才知道是「大埔海濱休閒生態水陸墟」（簡稱水陸墟），是個展示漁民生活的地方。內裏有各式攤檔如漁村傳統小食、鹹魚、蝦亁或貝殼精品等；另外又可坐搖櫓花船出海到三門仔漁排欣賞生態美景、漁村舞藝及樂器演奏。
水陸墟（69709661）
開放日期及時間︰星期日及公眾假期11:00am-6:00pm
入場費︰免費
交通︰可於大埔墟火車站轉乘接駁巴士
5:00pm
第五站 水壩放風箏看日落
遊完水陸墟，就到最後一站大美督，原本打算BBQ，但見到這個人山人海的場面，便決定到堤壩踏一圈，看看人家放風箏，欣賞日落。
5:30pm
第六站 彩色鄉村藝術館
玩到黃昏，不經不覺太陽伯伯都要收工，就在大美督食晚餐作全日終站。那兒有間外牆髹得色彩繽紛的餐廳，樓高三層，門前有個小花園，極具歐陸風情。據聞外牆是由館主鍾建新，花了一個月時間髹成，館內還分為地下的用餐區和二樓展覽場。餐廳晚膳主打大里名香肉系列，又有健康甜品及花茶，玩完一日，是時候在此食一個寫意晚餐。
鄉村藝術館（28241812）
地址：大埔龍尾村64號B
時間： 12:00nn-10:00pm
沙田單車遊
路線：沙田至大美督
途經：水警總部、科學園、吐露港公路、大埔海濱公園、大美督
需時：約4小時 難度：中下級
