好多家長都希望子女入名校，但九龍塘官立小學雖被一眾私校、直資、國際學校環抱，依然不難成為「平民名校」。識同學生玩心理嘅李校長喜作新嘗試，提出取消大測，用「進展性評估」代替測驗，即係每課完結後都有一個簡單測驗，同學唔須特別溫書，如果唔溫都識先係真正吸收。另外，同一單元嘅評估唔會只做一次，如第一次攞唔到100分，學生大可拿回家慢慢做。「返到屋企要問爸媽都無問題，因為肯主動發問都係一件好事。就算要做多幾次先攞100分都唔緊要，最重要係畀佢知自己都可做到完美。分數可以係一種鼓勵，視乎老師同校長識唔識用呢種工具。」李校長還表示，學校嘅校友同家長關係好好：「學校禮堂冷氣係靠大家籌款得嚟，家長更經常當義工，為課外活動做導師，所以每逢星期六的課外活動，氣氛都好熱鬧又融洽。」
記者︰劉昱蘭