街機大富翁　玩完有銀賺

《大富翁》咁嘅擲骰加卡Game都可以出街機？真係估SEGA唔到！已經係1904年老掉牙嘅遊戲，今時今日連擊落米格機何解有錢獎、點解賣黃牛票都唔上網Bid嘅年代，機舖Gamer竟然個個玩到兩眼發光，郁吓手都暢三幾百銀仔喪煲！細問下先知代幣竟然會變真金白銀，《大富翁》真係並非浪得虛名。

記者：朱崇德
攝影：陳陶鈞

代幣變錢大法！

由《大富翁》街機贏取的代幣，遊戲機中心不會用錢收番，因為咁做會觸犯賭博條例！這些代幣可在同場的G1賽馬、角子老虎及推銀仔等遊戲機上共用。不過醒目嘅機迷，贏了過千個代幣又點攞返屋企呢？有人就想出以低於市值在機舖現場「放代幣」，現時二手放幣價約$100/150代幣。以記者贏咗$1,267為例，二手價可放到$845，減去玩一晚$300本金，都有$545代入袋，難怪咁多人玩都咁瘋狂！

推銀機×大富翁

第一眼睇見呢部日本新返《MONOPOLYTHEMEDAL》，10呎呈立方機身放喺機舖真係非常雄偉，唔係大場都幾難放得佢落！基本玩法係將「冒險樂園」式推銀機Crossover《大富翁》，一於行街、買地、起酒店。收費$1換1個代幣，投幣推銀落街直接有得獎，大家耳熟能詳。不過《大富翁》部份就有啲唔同，每次投幣都可引發擲骰功能，行每步、買地買齊同色區就起酒店，不同處是起屋、買地唔使另畀錢，而且仲掉番轉畀錢你，並儲落個彩池「水塘」度。當你踏番正起點就成球畀番你，真係爽到似中六合彩！

■手槍形投幣口，可以確保投幣的準確性。

■推銀機部份，同一般「冒險樂園」有九成相似，玩法亦一樣。

轉戰大輪盤搵大錢

講到贏代幣精髓，都係大輪盤部份，同角子機一樣，要擲到孖7先可進入！遊戲會馬上轉戰機頂幸運輪。呢度基本上係另一個大富翁地圖縮版，不過獎分就由$5-$100不等，一樣係擲骰決定。而且這部份還有1-7倍的加乘效用，所以獎幣特別和味！記者以$300代幣為本，初次試玩情況下，都入過2次幸運大輪盤，一次更獎出$1,267個代幣。如果問打機攻略，就係投幣一定要快，明顯遊戲機會對這類玩家擲出孖7機會高啲。