上星期日跑完馬返到屋企，未到晚飯時間，於是睇電視新聞，睇完正想出門去馬會，換衫之際接建築邦來電：「喂，我喺大埔乜乜中心商場，電器舖內電視正在播映《傑出華人系列之余英時》，你一定有興趣睇。」
再開番電視，點出得門呀，坐在電視機前，睇到非常感動，曾經淚為之下，嚇親老婆。香港電台真係好好心機攝製《傑出華人系列》，遠赴普林斯頓大學拍攝余英時夫婦起居生活，大教授嘅薪水，足以支撐余氏住得安樂，安享晚年，如果佢哋住在香港，點可以住大屋、近竹林，細心做學問吖。物質好多時與做學問無關，但若有物質支持，不憂柴米，享受充份言論思想自由嘅話，學者做學問會更加得心應手。
鬼子佬講以前香港係借來的地方處於借來的時間。但係借得啱啱好，一九四九年以後，就是在這細小借來的地方，孕育了多少人才。余英時本來考入燕京大學歷史系，因父親逃難來港，佢特別來港一行，佢話一過了羅湖橋，好像頭上的壓力就沒有了，思想自由了，於是留在香港，因緣際會入咗桂林街新亞書院，跟隨錢穆先生學習，後來新亞推薦佢到哈佛讀博士。錢先生在其他地方寫新亞早期情況，曾經講過話送余英時到哈佛，係想希望佢他日成材，回到新亞教導啲學弟，但後來知道哈佛會留用余英時，就不忍阻佢前程，冇叫佢返香港。於是余英時在美國幾一帆風順咁發展佢嘅事業。
余英時話，在香港逗留嘅日子，覺得香港好自由，大陸共產黨與台灣國民黨都視余英時為反對派，唯獨香港可以容忍佢，令佢深感自由之重要，故此佢語重心長咁話：如果香港人認為我對香港有意義，那麼一句話不能不說，香港人不要為自己洗腦！余英時於上世紀五十年代初期，飄泊香港，深知中國學生去國無依之苦況。一九八九年中以後，佢在普林斯頓大學發揮影響力，幫助不少當時流亡美國嘅中國學生，其中好多已在大學取得博士學位，開始獨立成名，算係余先生對故國回饋。各位如果錯過咗，可以到香港電台網站 http://tv.rthk.org.hk重溫嘅。