一月二日，成班校友聚集，聽校友之中嘅投資專家講二○○八年投資展望。同去年一月三日星期三嘅同樣聚會中，經紀K傳下口訊「信者得救，勇者無懼，跳車要快，止蝕要狠；十年一閏，人生難逢，唔玩就輸晒，想玩就要精晒。」叫校友不怕買股票（見二○○七年一月六日本欄），聽佢講嘅，果然賺到錢，當時經紀K推薦1800，3898，一號，十六號，十三號，照跟嘅話，成績唔錯啦！鄭大班事後指點話買44號，股價已翻了不止一番。
今年又如何呢？經紀K說話小心好多噃，猛叫大家買股票要好謹慎，○八年有風險，但有一隻股票可以一路買，就係66（港鐵），佢講之時，港鐵好似做緊三十一元左右，到左丁山寫呢篇稿之時（一月七日收市後），港鐵升到去三十四元九角，真真正正係逆市奇葩，似足○八年強勢股。
跟住叫大銀行嘅投資總監H講股，總監H又係猛叫眾校友謹慎，○八年上半年會有大波動，賺錢不易，佢叫大家賣晒中資銀行股，買入本港地產股及銀行股。呢兩位專家都叫人謹慎，是日（一月二日）下午恒指跌勢甚急，都幾應景。
基金P在散會前趕到，介紹大家買番西王糖業（2088），唉，未寫啫，呢隻股近日已升到飛起。地產方面，大家一致睇好，經紀K主張大家買樓。地產W呢？佢去咗東京旅行，臨行前傳來幾張紙，叫左丁山在午餐會上宣讀。但時間所限，左丁山邊度讀得咁多吖，只係摘其精要，向大家發佈。地產W話豪宅已經升到癲咗，高追不宜，如果要追求升幅嘅話，不如買中下價樓，租金回報率更高喎，佢列舉大量數據，因篇幅所限，唔講咯。地產W嘅結論係：「潘多拉魔盒已經打開，香港樓市正式跟隨股市步入一個泡沫時代……沒有人知道泡沫何時爆破，但大抵不會在一年半載內。這是十年難得一見的投機機遇，有智慧不如乘勢，如果你懂得好好地掌握利用和進退有度，它會為你帶來巨額暴利，否則它會令你焦頭爛額。」