由話轉型做煤礦嗰一刻開始，關於蒙古能源（276）嘅事事非非一直無乜停過，呢頭俾人質疑究竟係咪有煤礦，嗰頭又試過俾內地《財經》雜誌形容為「大中華第一妖股」。前幾日，就到原名劉愛黨嘅神秘準大股東劉承霖被踢爆，曾牽涉入90年代末瀋陽慕馬貪腐案。
不過，成日俾人質疑又要出通告澄清，似乎都無影響蒙能小股東對主席、彤叔掌櫃魯連城嘅支持。噚日蒙能開股東會，大批傳媒殺到，希望親自同魯生「查詢」關於蒙能種種不解之謎，可惜蒙能只係派咗執董翁綺慧出席。翁小姐好正路咁「無」回答任何問題，華華惟有向小股東埋手。
小股東：傳媒成日中傷
一位着西裝電咗髮嘅表叔，點名話某兩家傳媒眼紅劉生，所以成日寫埋啲嘢中傷佢，有兩個阿伯就話好支持魯生同鄭生（即係彤叔）兩仔爺。華華問另一位蔡女士點解買蒙能，佢話由毫幾子嗰陣開始供股，賣咗又賺過，之後聽完財經講座推介之後再買，不過𠵱家已經無再去聽啲講座……
噚日朝早停牌嘅蒙能，晚上出通告，話收到佢哋委任嘅129勘探隊最後報告，確認佢哋個科布多煤礦係有3億噸藏量，所以個買礦交易可以plan喺今個月底或之前完成。