百富勤倒閉眨眼十年，一班舊臣子趁噚日十周年呢個日子，喺灣仔嘅喜萬年酒樓筵開六圍，緬懷一下過去嘅光輝歲月同風風雨雨，不過兩個舊老闆梁伯韜同杜輝廉都冇到，最大粒嘅係曾為百富勤打江山嘅高寶明。
華華一上到去喜萬年，就見到水牌大大隻字寫住「百記晚宴」，之後就碰到前幾年自立門戶嘅高寶明，佢同華華講，之前一班舊同事講起呢個重要日子，興起話要搞今次聚會。
想當年，百富勤係本地華資行嘅龍頭大哥，不過呢十年，雖然香港已經成為國際三大金融中心之一，但就未見能夠培育出相當具規模嘅本地證券行，可以同國際行一較高下。
華資行風光不再
講到呢度，高寶明好謙虛咁話：「時世唔同囉，當年百富勤冒起嘅時候，國際大行喺香港都唔算好活躍，𠵱家市場變化好大，國際大行都有沾手香港市場。其實𠵱家啲中資行都做得唔錯，好似中銀同中金。」
近幾年香港有北面條大水喉射住，金融市場迅速發展，如果當年唔係發生百富勤事件，今日嘅百富勤規模又會大成點？高寶明話：「世界轉變得好快，即使外面環境好，但亦有好多其他因素影響，所以呢啲假設性問題好難估計。」
電郵：mailto:[email protected]
