近排喺香港上映，馮小剛執導嘅大陸電影《集結號》，開戲資金原來包括由招商銀行（3968）提供嘅5000萬人仔無擔保貸款。據大陸《新華網》話，呢次係大陸銀行第一次借冇擔保貸款畀人開戲拍片，仲話招行為咗昅實筆貸款，唔想電影公司華誼亂咁使錢，所以派專人喺電影拍攝場地，北京、江西同瀋陽昅實，全程追蹤馮導演使錢過程。
專員全程昅實
咁都不特止，華誼仲要開一個資金監管戶口，每個月列出預算，跟單找數，找清上月嗰筆數，招行先至會再發下個月嘅貸款，《集結號》嘅票房收入都要存喺招行嘅特定戶口，跟到咁緊，華誼想走數都幾難。
好在《集結號》冇令招行失望，年初票房衝破2億人仔，招行呢筆貸款應該好穩陣。咁睇招行嚟緊都會積極開拓電影借貸市場。招行行長馬蔚華果然領導有方，唔怪得近日招行發盈喜，話去年盈利增長超過1倍，料達150億人仔，招行股價一年更升咗九成六。