明朝有宦官將原意玩弄野獸嘅「豹房」，改裝成以「淫」為樂嘅「炮房」；差不多500年後，包括廸高、基斯坦奴朗拿度（C朗）等5名葡國國腳，準備斥資6,000萬歐元（約6.8億港元）興建度假村，惟班友仔出名愛蒲爛玩，不免令人懷疑係咪掛羊頭賣狗肉之作？
錢冇人嫌多，即使效力歐洲4大聯賽嘅球員周薪超高，我求大俠捱足幾個月騾仔都儲唔到咁多，但葡國行家披露該國國腳卡維奴、堤亞高文廸斯、保羅費拉拿，將以廸高同C朗為首殺入商界，並已入股祖家南部省份阿爾加維一家酒店，準備再擴充成全國最豪華嘅度假村。
座落南部阿爾加維
阿爾加維以迷人嘅海岸景色聞名，夏季吸引無數歐洲人前往避暑，而C朗、廸高就睇準該地頭有光明前景，所以他倆連同葡軍同袍，已購入該酒店5成股份，諗好點樣大展拳腳！據知該「香格拉里」級數嘅超豪華酒店，400間房收費約2,000至4,000歐元一晚，設施包括一般嘅酒吧、泳池、健身室、高爾夫球場等，總之要乜有乜；酒店董事長透露：「C朗佢哋野心勃勃，計劃總數注資約6,000萬歐元，要成為全國最有睇頭嘅度假村。」酒店擴充工程於2月展開，順利嘅話，首期喺下半年竣工，該群「蒲」友兼老細屆時會前往剪綵，令頭炮有咁響得咁響。
避開傳媒一石二鳥
然而，「性」情中人嘅廸高曾被踢爆背妻偷食、而C朗亦遭報道過多P派對等花邊新聞，足證佢哋確係愛蒲之人；今番睇中酒店業務，究竟係咪有生意頭腦，希望賺個盤滿缽滿之餘，又可避開傳媒耳目，喺秘密私竇大搞另類派對，一石二鳥呢？我求大俠唔敢妄下判斷，都係扮高深學王家衛，留番啲思考空間畀讀者諗喇！