不如等華華講吓「百記」嘅威水史。話說，杜輝廉同梁伯韜喺88年創立百富勤國際，從事證券買賣同企業融資業務，當時吸引到一大班城中富豪支持，包括超人李嘉誠，合和（054）胡應湘、中信泰富（267）榮智健同大劉劉鑾雄等人，連國際大鱷索羅斯都有份入股。
最令人津津樂道嘅威水史，莫過於喺梁伯韜領軍下，協助唔少大陸企業喺香港上市集資，贏得「紅籌之父」嘅美譽。單係睇番97年，百富勤就為紅籌國企集資150億銀，揮低唔少外資大行。但又邊個會諗到，一間市值120億嘅本地薑亞洲投資銀行，喺一個亞洲金融風暴巨浪冚埋嚟下，短短兩個幾月，乜都冇晒，落得清盤收場。