陳奕迅（Eason）上年喺香港嘅演唱會掀起撲飛潮，去到台灣開個唱一樣掂，下月2號佢會喺中山足球場開「Eason'sMovingOnTheStage2」戶外演唱會，兩個禮拜賣咗超過15,000張飛，噚日Eason專程去咗台灣出席慶功記者會，主辦機構之一大國文化董事行政總裁李進都有陪佢一齊到場。
預咗過時罰錢
Eason話自己出咗超過10張國語碟，但只係第一次喺台北開演唱會，年前Eason喺台灣演出嘅時候蛋蛋受傷，佢追問主辦單位點解今次淨係幫佢嘅「蛋蛋」投保2億5千萬新台幣（約6千萬港元），佢話：「那其他部位呢？還有受益人是誰？」主辦單位解釋係全身投保，受益人係佢，Eason先放下心頭大石。
Eason嘅香港演唱會有同舞蹈藝員超激演出，佢向台灣記者拍心口話激情部份一定唔會刪減，不過台灣做騷超過10點半就會罰錢，主辦單位話會畀佢唱個夠，已做好罰錢準備。
