舊年全城最紅嘅大孖沙，非香港股神李四叔莫屬，同香港市民有股齊齊炒，有錢齊齊搵。對街外人都咁慷慨，何況係自己嘅下屬。
今日係恒地（012）出花紅嘅日子，唔知係咪李四叔想留番個驚喜畀員工，記得舊年底，四叔講過，表現出色嘅員工，會有多半年人工做花紅。華華噚日聽聞，原來唔止呢個數，最多係9個月先啱，而最少嘅都起碼有1個月人工嘅花紅。
舊年四叔時不時都有驚喜畀大家，新一年對恒地員工嚟講，除咗花紅較預期和味，相信就係5日半長短周工作時間表，聽恒地員工講，以前一個禮拜返五日半，家陣就隔個禮拜先返五日半，即係每個月多兩日假，據聞其他大發展商都冇類似安排。
最多有9個月人工
講番花紅，早輪有統計話，今年私人機構出嘅花紅，大概由2至20個月，最好嘅當然係股票行，地產行業就中中哋，唔計個別最多幾十個月嘅神秘例子外，代理界花紅都有三四個月。