港股繼續大幅波動，呢輪興轉向，連續兩日之後，噚日又嚟多一次。恒指最低26757，跌355點，午後市勢突然勁升，掃到上27615高收，大升502點，成交再上番1200億元；H指升勢仲勁，高收16139，大升479點，升幅3%。
6行3保個勢好靚，大幅調整完成，由低位反彈20%至30%，已好和味。噚日推介嘅建行（939），早段跌市時最低成6.12元，午後掉頭急上，越衝越有勁，結果掃到上6.59元高收，大升0.38元，升幅6.1%，升勢已確認，繼續持有。
光大控股（165）再上，高收27.65元，再升1.35元，升幅5.1%，10日線已重上20日線，而50日線在27.66元水平，若破位而上，則光控將開展中期上升大浪，上月初的30元高位，或會停一停，之後就會挑戰去年11月初的37.7元高位阻力，在今年上半年，股價好大機會坐四望五。
市傳北水將復來
大市急升，自必有因，收市後就有內地「密電」話人民幣太強勢，中央將會在未來兩三個禮拜內，再度「洩洪」，詳情未見透露，但唔排除港股直通車會正式開動。消息話中港經過多月的「安排」後，「保險」工作已做到十足十，直通車開通，順風順水，唔會有意外。
北水既然會再大舉南下，中資股自必然係首選嘅投資和炒賣對象，呢輪汽車股大強勢，食正內地今年嘅內需熱潮，汽車股仲會有排上。
駿威係汽車股中最強勢一隻，近日已重上去年10月底嘅高位5.65元水平。過去兩個多月，駿威走勢形成徘徊區，低位4.5元，高位5.65元，噚日升後調整，收5.32元，跌3仙，形成旗形，可趁機吸納，升破5.65元加碼，短線可睇6.7元。
本田定價有優勢
駿威消息利好，旗下廣州本田正式推出第8代雅閣，截至1月6日止，定單已突破5萬輛，預期今年第8代雅閣產量可達到17.8萬輛，佔08年全廠產銷計劃34萬輛逾50%。駿威生產的本田汽車，在級數上較一般國產汽車為高，在定價上有一定優勢，而公司獲批成立自有引擎生產設施，對提升利潤率亦大有幫助。