馬鞍山陳生推介新鴻基地產（016），佢話：「之前買過長實（001），今次睇新地，諗住喺150蚊入，但係等唔到呢個位。」新地噚日收報168.8蚊，跌1蚊，對上一次跌破150蚊已經係舊年12月17日，當時收報148.9蚊。
亨達集團研究部董事黃敏碩話：「都可以考慮，你set嘅買入價都算穩陣，150蚊唔算高，不過短期未必落得返150蚊，如果睇好新地，可以考慮高番少少入，因為佢50天線喺153蚊，如果要等到150蚊，就等如穿50天線，你睇新地都係向上望啦，跌落嚟走勢反而唔靚仔。」
目標價上望$180
孫柏文問陳生點解考慮新地，已經有幾年炒股經驗嘅陳生話，「好多證券行話新地可吸納，既係龍頭，又係純地產股」。
黃敏碩就話：「新地嚟緊繼續增加內地儲備，地產股升值潛力進一步推高，可以考慮喺153蚊呢個技術水平入市。」
陳生問目標價係咪睇170蚊，黃敏碩回應：「唔只係睇樓價，仲要confirm埋公司嘅因素，樂觀啲可以睇番180蚊。」
黃敏碩指出，新地可以睇高一線，係因為土地儲備增加，又同麗星郵輪（678）競投啓德郵輪碼頭，喺內地亦繼續發展多元化項目，增加收益。
廣深鐵路（525）
股價短期可反彈
大埔關公推介廣深鐵路（525），佢舊年6.2蚊買入，諗住長揸，目標價睇7蚊，關公話：「雖然家陣坐緊艇，但都唔係太驚，隻股舊年大部份時間企穩喺5至6蚊之間，幾穩陣，可以當大陸內需股嚟投資。」黃敏碩問：「點解你覺得廣深鐵路係內需股，唔係基建股嘅？」關公話：「乜唔係中交建（1800）先係基建股咩？」黃敏碩話：「廣深鐵經營鐵路業務，股票概念上係屬基建股，並唔係內需股。」
關公補充：「聽聞佢母公司會注資，冇理由中鐵（390）同中交建升佢唔升㗎，兼且又話佢獲批加票價。」黃敏碩問：「你有冇問過自己，點解廣深鐵會跑輸中鐵同中交建？」關公話：「市場炒新鮮嘛！話晒廣深鐵上咗市咁耐。」黃敏碩話：「廣深鐵防守性強，未來走勢要睇鐵路網絡發展，乘客量增長，嚟緊春節客運量增加，股價有機會短期反彈，但市場資金追捧龍頭股，廣深鐵要上到7蚊，要有耐性。」
關公個案
買入價：$6.2
目標價：$7
止蝕價：$5
時間：長期持有
工商銀行（1398）
憧憬盈喜博短炒
西貢Michael早前推介靈寶黃金（3330），早幾日終於到6蚊目標價，噚日佢再貼另一隻股工商銀行（1398），原因係早前招行（3968）發盈喜，所以特別睇好工行，建議5.3蚊買入，睇6蚊，短炒三個月，不設止蝕價。Michael話：「之前可能受到限制貸款，影響市場對中資銀行股嘅睇法，但係細心睇番好多大行報告，限制貸款其實對大型中資銀行或者存款基礎較大嘅銀行，例如建行（939）、工行影響未必咁大。」黃敏碩提醒：「現價反映合理水平，對工行睇法屬於中性，不過要留意有冇其他政策出台。」
Michael建議
建議買入價：$5.30
目標價：$6
止蝕價：－
時間：3個月
中創投資（1217）
宜看清盈利貢獻
旺角Peter推介冷門細價股中國創新投資（1217），佢話：「呢間係一間投資控股公司，現時投資大陸軍工企業，嚟緊呢啲公司會股份化，引入外資，所以會食正軍工民用潮，兼且大股東又不斷注資，又同中信、中國兵器集團合作，可以值得考慮。」
黃敏碩提醒：「你講緊嘅投資都係報紙報道，仲未係實際嘅投資發展，所以要小心佢嘅投資清晰度，同埋未來實際盈利貢獻。」孫柏文話：「如果間公司有解放軍背景參與，都會幾穩陣。」Peter補充：「推介中國創新投資都係炒概念啫。」
Peter建議
建議買入價：$0.216
目標價：－
止蝕價：$0.17
時間：－
沿海家園（1124）
業績佳須防宏調
將軍澳周小姐推介內房股沿海家園（1124），建議1.45蚊買入，目標價1.8蚊，揸半年。黃敏碩話：「你都算幾藝高人膽大，宏調未完，又話要向閒置土地徵收增值費用，你都建議買內房股？」周小姐解釋：「公佈嘅中期業績幾靚，如果唔計2.2億銀撥備，毛利有成4.2億銀，增長10倍。」孫柏文即刻話：「業績係倒後鏡，𠵱家大陸打壓樓價，就算管理層點叻都冇用。」
黃敏碩指：「現時沿海嘅土地儲備有490萬平方米，碧桂園（2007）曾經號稱自己有5000萬土地儲備。如果宏調近尾聲，內房股要反彈，都未輪到沿海家園，倒不如揀中國海外（688），遠洋地產（3377）同華潤置地（1109），又有母公司注地概念。」
周小姐建議
建議買入價：$1.45
目標價：$1.8
止蝕價：$1.4
時間：半年
今日嘉賓：英皇證券研究部主管沈振盈
歡迎Phonein28698262
http://appleactionews.com/features/finance/
每日收市後4:30pm
想搵名家教路，請登入
http://appledaily.atnext.com/jp/finance登記
成功參與節目者，有機會獲贈禮品，登記成為「Webcam之友」，更有機會獲得（aastocks）即時報價賬戶
*下午3時半開始，優先接受登記
