戰神回歸！
自問對速度感有一定渴求，尤其係見到超級跑車戰神GT-R出現眼前就更加躍躍欲試。早前〈Car通〉舉辦咗讀者實試戰神嘅活動，反應熱烈，經老編絞盡腦汁篩選出最後6位讀者前來試坐480匹嘅無比威力，下車一刻問到：「驚唔驚？」回應係：「唔驚，不過腎上腺狂飆啫……（下刪百字）」480匹戰神威力果真非同凡響！
記者：梁美甜
攝影：周旭文
協力：徐影龍
未夠秤
濠江小子
聽過未學行先學走未？Francis車牌都未有就視GT-R為DreamCar，「細細個已聽過戰神喺東望洋Fight低寶馬同好多歐洲勁車，仲要拋離幾個圈，早就成為我心中DreamCar！」可能因為咁，Francis孤身由濠江而來，所以一見GT-R即急不及待坐上駕駛座了，與其他讀者交換心得都有紋有路，老積得很。唯一露出孩子氣就是試坐完下車一刻，耳臉因興奮而通紅，說話亦震咗幾粒字之後才能調整心情，「好夠爆炸力，之前坐過露筍4代都無呢種推背感！」
汽車知識
全憑打機
Kenneth係幾人中最有個人見解嘅一位，何以未有牌但就知道那麼多汽車知識呢？「全部來自遊戲機囉！」今次實試亦係Kenneth第一次試坐性能咁強嘅車，「加速就好似入咗氮氣咁！」打機加氮氣，部車即狂飆，大家可以想像GT-R加速及爆炸力有幾勁呢！
唯一有要求
大學生
今次實試基於安全及保險問題，讀者只可以坐而唔可以揸，但大學三年班嘅Ronald於當初電郵入面已經提出少少要求，希望可以撻吓匙或踩吓空油！我哋不嬲都會成人之美，Ronald呢個願望亦唔難，反而佢自己坐到駕駛座有點緊張腳震震兼唔知點撻車，而佢嗰下空油亦引起大家另一個話題：「引擎聲咁斯文嘅？」就算實試回來，Ronald都說GT-R嘅引擎聲比想像中斯文及低沉，「以為會好嘈，不過佢加速真係好有力，直路連環推背好嚇人。」
錄低引擎聲
返歸慢慢聽
一向都揸開日本車嘅Micheal，早知戰神實力，但坐上駕駛席先彈兩句：「軚盤太多掣，GT-R係以性能取勝，太多掣同Function反而唔可以專注享受駕駛樂趣。」跑車好多時都擁有一副好聽嘅引擎聲，所以Micheal試坐時專登錄低戰神副偈嘅咆哮聲重聽，雖然比佢想像中斯文柔和，但佢重聽時嘅表情依然滿足。
對日系車
改觀
Terry喺幾位讀者中最有實戰經驗，更直言偏好歐洲車，連轟動一時嘅超跑AudiR8都已收歸旗下，「GT-R外形OK，好European-like，性能毋庸置疑，最估唔到佢真係咁有爆炸力，仲要係順住嚟，舒服而強勁，亦因此對日系車改觀，GT-R絕對係一部可以日常出街揸嘅SuperCar，唔係剛剛買咗R8，我都會揀佢！不過若能像歐洲車般，讓客人自定車櫳陳設，相信會更受歡迎。」
再見四圓燈
等九年
Andy係第一個實試戰神480匹嘅人，一下車：「掟彎將我拋埋一邊！」認為胎咬地但跑椅唔夠承包，加速及Brake反應亦非常敏捷，曾擔心過司機遲遲唔踩Brake驚收唔切，好彩隨叫隨有收得舒服。「GT-R一向實用，尾箱好大，不過後排勁迫，包保外母唔敢跟車做電燈泡。」
美甜叨光搶試
美甜：外形係幾有肌肉感，但就比我想像中斯文，不過Over480匹嘅車我都係第一次試坐，推背就預咗，勢估唔到係要角力嗰種囉！可惜基於安全理由唔可以放盡嚟試，叨光得來嘅經驗係——戰神嘅加速絕對叫人不自控地腎上腺急升，過癮！
9車同台谷《GT5P》
1月17日係PS3嘅《GT5P》中文版推出大日子，SCEH喺前日好高調咁搞咗個記者會力谷，唔止一大班RacingQueen蒲頭助勢，富利堡更出動足足9架GT-R撐場，成千萬車價夠晒嚇鬼！因乜事咁大陣仗？其實喺次世代《GT》入面，風頭最勁同號稱快過法拉利嘅，就係呢架剛到港嘅日產GT-R，所以PS3順理成章以佢為宣傳重點。富記老闆Eric仲喺現場交車匙畀全港首位車主㖭。
順帶一提，《GT5P》中文版對港機迷好有用，因為遊戲內參賽車款有限制，日文版唔會用英文顯示車名，逐架入車廠對番個名嚟搵車都幾煩，所以下周四推出嘅中文版會啱港人多啲。
頂級版加咗乜？
實試花絮
今日試車活動原定只有5個名額，但最後居然有位澳門讀者報名，山長水遠為嘗DreamCar戰神威力，老編受其誠意感動破例受埋佢玩！活動由下午1點開始，大家傾吓偈WarmUp之後就親身接觸GT-R，之後由經驗師傅揸車，以安全車速喺將軍澳工業村走一轉，實地感受戰神嘅威力。個個下車都臉紅耳熱，興奮到暈，又係嘅，真車喺媒體就見得多，摸都未摸過更莫講話坐，難怪大家實試完都興奮得滔滔不絕講個唔停喇！
NissanGT-R頂級版規格
引擎：3,799c.c.DOHCV6Twin-turbocharged
馬力：480hp/6,400rpm
扭力：60kgm/3,200-5,200rpm
傳動：6前速半自動波箱
查詢：富利堡（23330747）
供款幫你計
首期：104,900 利率：6%
月供：約$24,000（48期）
＊以上數據僅供參考