恒安國際（1044）噚日發出通告，委任翁以申為集團首席技術官，華華睇到個名咁熟口熟面，即刻聯想起會唔會同前香港總商會總裁，家陣做緊利童反斗城董事總經理嘅翁以登有親戚關係呢？打電話去嗰邊嘅公關度打聽吓，證實咗原來翁以申同翁以登確係兩兄弟，不過冇講到邊個大邊個細。
講到翁以登呢個兄弟翁以申就巴閉囉，佢原來係一個女性用品設計專家，即係乜？諗吓恒安國際做啲乜嘢生意就估到啦！翁以申專門從事研發同設計衞生巾、紙尿褲同衞生材料，佢喺呢行有豐富經驗，畢業於美國俄亥俄州立大學高分子化學，擁有博士學位。唔單止咁，翁以申仲係一個發明家，喺美國攞咗十款紙尿褲、衞生巾同無紡布應用設計嘅專利，喺97年，仲畀列入為「世界名人錄」（MarquisWho'sWhointheWorld）。唔怪得恒安國際主席施文博都好開心咁話：「得到翁以申嘅加盟，會令恒安喺個人衞生用品行業嘅領導地位更鞏固。」