小妹自問都算係一個精明嘅消費者，勢估唔到比渣打銀行呃咗，仲呃足近半年。話說舊年8月小妹去灣仔會展參觀傢俬展，睇到渣打銀行擺咗個攤位叫人申請白金信用卡，推銷員姐姐拉住小妹話，迎新禮品係名牌旅行篋。
小妹心郁郁申請，咪攞張form返屋企慢慢研究。推銷姐姐話即場申請交埋糧單同住址證明，即送張50蚊超巿現金券。吓，一般人點會隨身帶住糧單，佢話唔緊要，三日內將資料傳真畀銀行，一樣有現金券。一時貪心就中招，小妹等到張卡寄到嚟，簽埋指定金額，換埋迎新禮物，暫未見50蚊現金券。
舊年10月頭打去渣打問，職員話等多兩、三禮拜會到，結果無下文。12月頭再打，對方話可能寄失咗，話會以掛號信寄番張coupon。小妹再信佢一次，結果再被騙一次。50蚊就試到呢間銀行嘅誠信去到邊。消委會老友Christine話，年中都收到唔少呢啲投訴，雖然只係50蚊，銀行都要履行承諾。
逢周一至周四刊出