賭王何鴻燊早前公開論盡何家淑女，四姨太梁安琪的18歲長女何超盈，慘被老竇指為「麻麻哋靚」，身為母親的梁安琪前日仍發牢騷，指愛女似她，自己又做議員做到殘，實行兩母女齊齊減肥，努力變靚。
賭王何鴻燊四姨太梁安琪前日與一對子女何超欣、何猷亨，在金鐘Cova嘆茶敍天倫。一身Chanel的梁安琪，初時戴着墨鏡看雜誌，發現記者後，就叫人先行帶兩個子女離開。梁安琪表示當日是家庭日，她說：「今日冇嘢做，聽日又要開（澳門）立法會會議，為勞工服務。」
讀書成績好
問新一年有甚麼願望？梁安琪說：「希望股票繼續升，無論做生意定打工，都希望經濟好，世界和平，啲海水唔好不斷上升，唔係世界就乜都冇。」她透露長女超盈已返英讀書，她說：「佢讀書幾好，之前全英國嘅會考，佢有七、八個A，嗰時佢喺香港成績麻麻哋，香港地方細，人又多，令到小朋友冇乜創造性。」
超盈離港前，指返英後誓要減肥變靚，梁安琪大表贊成說：「梗係要啦，我要求佢減好耐，佢要盡量減，我都要求自己減。」她又為了賭王之前指超盈「麻麻哋靚」的言論發牢騷說：「你哋話佢麻麻哋，佢咁似我，咪即係話我又麻麻哋？不過我𠵱家做議員，個樣都殘晒！」
贊成讀法律
對於超盈透露有意攻讀法律，梁安琪說：「佢幾有呢方面天份，今次考試成績都幾好，所以畀佢返香港鬆一鬆。」有否送珠寶靚衫作獎勵？她說：「唔可以太多，人要不斷努力，識乜朋友都唔緊要，最緊要修心，書要盡量去讀，做事要分輕重。」
採訪、攝影：LawWaiMan
