蕭定一旗下嘅變靚D（8079），一手打造第一代「人造人歌星」──陳樂榣、甄穎珊、石詠莉，唔單止大執樣貌兼身材，「整容三嬌」仲成為女子組合Freeze，打正旗號sell身材、賣性感。唔知係咪因為未煲起Freeze，噚日變靚D公佈，成立一間JV（合營公司），同美容、整容冇直接關係，但係有間接關係，事關間JV會製造同埋發行電影，唔知係咪想捧Freeze做埋影星？
雖然變靚D通告只係話，眼見韓片《醜女大翻身》叫好又叫座，加上甄穎珊主持嘅電視節目《唔使怕醜》又有noise（假假哋都收到175宗投訴），認為要把握大好機會參與電影製作同分銷。
呢間JV叫做OneDollarMoviesProductionsLimited，總投資額1800萬銀，變靚D持股40個巴仙，不過合作方HeavenlyBlaze都係嗰班人，咪就係蕭定一、佢姑姐蕭定慈同老竇蕭若元等一致行動人士囉。