殘年急景，大把人詐癲納福，初聽聞有男子兩個月行勻8百間7仔，我估佢，一係儍、一係想紅。
約男子訪問，他電郵講一次Nervous、見面又講Nervous，原來佢真係Nervous，影相似PE阿Sir教跑步，微笑與手勢都要專人指導。
年中多少人自我炒作博見報，這個人來港3年不會中文，更遑論《蘋果》，「其實，點解你哋對我嘅故事有興趣？」發問時十級認真。
他對我認為唔出奇之事覺得出奇，我覺得出奇之事佢又覺得唔奇，哎吔，到底我儍定佢儍？
記者：劉嘉蕙
部份攝影：楊錦文
第一回 些芬門起誓
男子名叫Lorencio，來自美國西雅圖，身懷幾分之一中國血統，05年跟做義工的機構來香港，順便入城大念法律碩士。一如大部份外籍學生，他日頭返學，周末落吧飲酒消遣，某夜酒酣耳熱許下豪言。
「我們都愛些芬（Seven），蘭記灣仔一帶酒吧太貴消費不起，最好到7仔買啤酒飲天光。一天飲飲吓我發作，立誓要行勻全港所有7仔，起初以為只有2、3百間，後來先知有8百幾間！」
Lorencio說，自己從小守規律、怕醜，大學念政治及歷史系，最憎人吹水唔抹嘴。「我覺得，做人一定要有行動！如果我只說不做，Iwouldbethebiggesthypocriteintheworld！（我會是全世界最虛偽的人）」
Notcrazy,justdifferent
「這類馬拉松，在美國很普遍，Idon'tthinkIamcrazy，I'mjustdifferent！如果我Crazy，我唔只影張相仔咁簡單啦。」
他說自己今年2X歲，是普通學生，靠公共交通工具走遍全港九7仔，是要告訴世人凡事可成真。
「我小時志願做美國總統，因為想貢獻自己服務世人，後來覺得權力會令人腐敗，近年想到第三世界國家幫助窮人。」
美國仔個個想做總統，香港小孩冇人想做特首，也許這叫做文化差異。
第二回 兩個月KO全港7仔
記者平日做訪問，遇到生暴地址，總Check個黃頁問吓人點去才安心，Lorencio遊7仔，紙仔都冇張就出發，很有冒險家精神。
他的網站寫得詳，07年10月3日出發，只定區不定點，首站沙田區，落港鐵站開始行行行，發現有7仔，停低影張相，再行，全程不問人。他住九龍塘區城大宿舍，因為遊7仔，兩個月內跑勻港九新界離島，機場、大佛、落馬洲、梅窩7仔都難逃他腳趾罅。
「商場7仔最難找，一係有水牌冇地圖，一係有地圖冇水牌，我好Unlucky，搭電梯上樓，就會發覺7仔在地庫，去葵涌貨櫃碼頭，又行錯另一座大廈，走了許多寃枉路。」他一至五返學、去法院實習，只在周末出動，兩個月已經可以KO全港，簡直令開口埋口嫌路遠的香港人汗顏。
途中也想過放棄，「行了百多間，覺得浪費太多時間金錢，想過停，但我覺得做人要有恒心，加上想籌款，所以繼續。」
第800站叫停
他目標大但想法務實，不做多餘事，「大家愛問，點解唔去一間買一樣嘢紀念，我覺得冇必要，也沒有錢。7仔全港有8百多間，我決定停在8百就算了，因為7仔開得密，你追不完。沒有去的幾十間，多是因為實際原因，譬如港澳碼頭有一間開在禁區內，我不想為去一間7仔買船飛。」
第三回 7仔八達通第一人
他讀法律，有業權觸覺，行到一半主動知會7仔，以示尊重，結果7仔找他去傾偈。「他們想了解我進度，給我7仔分店地址，又送我8百元面值的7仔版八達通卡，當贊助車馬費。7仔方面話，張八達通是員工專利，我是第一個擁有此卡的非員工。」那時他行了全港過半7仔，「聽聞老闆亦只去過2、3百間。」7仔當他尊貴客人，順便問他營運意見，「問我覺得Logo點樣，生意點可以搞得好啲。我建議7仔避免將櫃員機Set得太入，秩序好混亂，全部Set晒門口，人流會較暢通。」一邊講，他也覺得好笑。
講講吓，7仔知道他為國際十字路會籌款，答應一間捐$10，埋單801間，即$8,010，加埋Lorencio自己捐$500，朋友捐幾百，目前籌得1萬，「I'mproudofit！」他精心打造7遊記Website，又開Facebook分享事件，現時網站累積過萬人次，善款有望提升。
第四回 九龍塘謝幕好Depress
12月初，七遊記落幕，他在西貢找到第8百間7仔，另外選了九龍塘站7仔做閉幕，「因為近宿舍，希望朋友分享重要時刻。」完成壯舉後，他自言Depressed了好幾天。
下一步要寫書，靈感來自霍金的UniverseinaNutshell，他的書是，UniverseinaTV。「是比較哲學性的書，我覺得地球是個大電視，我們每人是一個頻道，神在遠方拿着遙控器，有時轉轉台。有時人類會埋怨運氣壞，可能是神剛好在睇其他台，唔得閒睇你。」他想傳遞的訊息是，做人毋須太緊張，應該多做自己喜歡的事，不要時時刻刻講錢。「像我遊7仔，看似是一件微小的事，但我很享受過程，每發現一間7仔，都會打從心裏覺得興奮。」
71站7-11
後記：ToBeContinued
Lorencio是年度我最喜愛受訪者。我電郵隨口話想畫「達標BodyArt」影相，他回郵「好，我畫定出門口」，後補加「或者你可以畫埋我背脊」。
約在中環，我說等陣去轉玩具店買身體彩繪物料，順便問佢用開隻色邊度買，「我用Marker。」Marker?!「冇錢買專用油彩，唔緊要洗吓就甩。」。
畫背脊，我用卓X5蚊眉筆，在中環鬧市7仔門口塗完一圈又一圈，他粒聲唔出任我舞。訪問當日最低13℃。
當晚收到電郵，「Youknowwhat？」宿舍忽然制水，我冇凉冲，要同BodyArt一齊瞓！」令我隱隱有做錯事之感。
Lorencio說，他的腳步為慈善而開，只要有人贊助，不介意行第802間7仔或轉去麥記或Starbucks。臨走又再三提醒記者，記得叫人支持善事。
容我最後一句寫英文，讓看不明中文的Lorencio知道我收到。
SupportLorencioandmakeadonation： http://www.lorencio.us
