論人氣豪華MPV，首推水貨行貨一樣大賣嘅EstimaHybrid，豐田力推環保車系全球聞名，剛到港新版玩得更盡，將MPV8座位削剩4個位，主打豪華闊落兼設備夠多，有齊雪櫃、音響、DVD及屏幕，睇戲開餐乜都得，就好似今日嘅小公主Suki咁，將屋企間房搬咗出街，唔使落車都可以玩餐飽。
記者：黎頌詩
攝影：伍慶泉
Model：Suki
車廂似屋企
一趟開車門，最雀躍嘅肯定係你家中嘅刁蠻小公主，點解？坐車都可以玩得好開心嘛！本來容納6個座位嘅後座空間，換上雙座椅，空間大大提升，簡直可以將屋企嘅玩具房搬上車，座椅十足飛機頭等艙，有埋舒適腳踏，舒服到你想瞓番覺。當然小公主會話瞓覺實在太浪費，因為大把節目！座椅前方是個有桃木裝飾嘅大櫃，上面仲有個行針時鐘，好有歐洲車嘅古典味，不過開櫃就仲精采，因為內裝一個迷你雙門雪櫃，最啱擺多啲美味果汁，同Honey把酒談心都唔錯！
雪櫃上方，係一套影音設備，拉下車頂的屏幕，就梗係好戲連場啦！跟住喺車內尋寶都好好玩，因為有唔少隱蔽儲物位。最驚喜就梗係打開兩個座位間的特闊手枕，裏面唔單止可以拉出張餐枱，仲有埋塊化妝鏡，隨時可以扮靚靚。
a.投射式錶板，簡潔清晰。
b.中控台屏幕功能多多，可顯示車側和車後的情況（左），入後波時亦有泊車輔助功能（右）。
舊版線條圓潤
呢部4座位版EstimaHybrid，查實係上一代版本，外觀同內櫳鋪排都同新版好唔同；圓碌碌中控台加線條不規則的細長形儀錶板，似大大個豆號，造型頗有趣。而波箱設於軚盤側，令前排座位更具空間感。
講到豪味，就全靠軚環同中控台嘅桃木裝飾嚟催谷，其餘嘅豪華搞作就唔多，設備都係基本嘢。值得一提係日本好興嘅中控台顯示屏，除可顯示動能狀態，亦可監察行車時兩側和車後的情況。
入後波嘅話，又有輔助泊車功能，有無用見仁見智，最緊要係夠潮。睇埋外觀，呢部舊版嘅賣相明顯比造型寸爆嘅新一代來得斯文。風格迥異，頭燈設計發揮了主要影響。相比起新一代線條充滿菱角呢部嘅頭燈就顯得好渾圓，呈V形的細長鬼面罩配上電鍍飾邊，唔賣跑味，但係都好有英氣。尾燈椅線條一樣夠圓潤，睇起嚟好趣致。最有剛陽味嘅係側鏡同胎軨，充滿硬朗粗獷感。
穩陣斯文
一直以嚟EstimaHybrid人氣十足，除咗內櫳闊落多花臣外，佢嘅環保混能系統一樣功不可沒。出晒名嘅Hybrid驅動系統，加上無段變速波箱，E-Four電動四輪驅動系統，使Estima具有低油耗、低排放嘅賣點。2.4VVTi引擎，備有分置車身前後部份嘅兩組馬達，配合不同行車情況操作。
究竟呢套人氣組合喺呢部舊版EstimaHybrid身上發揮嘅功力如何？可以說，和車的外形風格一樣，斯斯文文。起動暢順，但不見得特別有力量感，若全速前進，電油引擎和兩個電動馬達會同時操作，變成四輪驅動，感覺係穩穩陣陣。
車身大及重，令走彎時靈活度不足，不過公平點說，即使唔靠先進嘅輔助設備，要驅動這龐然大物意外地容易。最值得讚係避震，比我試過的百萬豪轎更舒服！無可否認EstimaHybrid作為家庭車，安全度高亦易操控，受歡迎梗有道理。
供款幫你計
車價：$499,000
首期：$49,900
利率：6%
年期：48期
每月供款：$11,600
註：以上數據僅供參考，一切以財務公司最後審批為準。
EstimaHybridE-Four規格
引擎：直4DOHCVVT-i
容積：2,362c.c.
馬力：131ps/5,600rpm
扭力：19.4kgm/4,000rpm
前電動馬達
馬力：17.5ps/1,130-3,000rpm
扭力：11.2kgm/0-1,130rpm
後電動馬達
馬力：24.3ps/1,910-2,500rpm
扭力：11.0kgm/0-400rpm
驅動：前置引擎，前輪/四輪驅動
傳動：無段變速CVT波箱
查詢：富利堡（28776700）