港股好反覆,年頭到𠵱家5個交易日玩「跳彈床」,心血少啲嘅股民想唔暈浪都唔得,前日個市喺低位掃番高,昨日高開之後又插番轉頭,做錯邊都幾傷,不過,好戲仲喺後頭,大家睇吓幅日線圖就知道,港股家陣等緊消息突破,短線炒賣千祈唔好太大注,尤其玩輪,否則估錯邊要止蝕都止唔切。
花旗股市前晚喺低位反覆,道指同標普500指數都算企番定,但係納指就仲未止瀉,呢幾日花旗嗰邊想炒減息,如果咁都炒唔起,股市好快會瀉過。
網通C輪6736:網通(906)昨收23.8元,股價喺22.8元至23.75元之間橫行咗好耐,昨日升過上去24.8元,尾市升幅收窄,睇成交同買賣手影,應該係炒上去試26.5元高位嘅時候,可以諗吓隻C輪6736,昨收37仙,槓桿率6.4倍(有效4.4倍),正股升上26.5元,6736應該見57仙,正股跌穿22.6元止蝕。