汪明荃（阿姐）、胡杏兒同黃宗澤嘅「鐵三角」陣容，將古裝劇《我的野蠻奶奶》重新演繹時裝版《野蠻奶奶大戰戈師奶》，上周元旦日首播，雖然只播映咗4集，但就攞晒頭威，平均收視高達33點，約207萬觀眾捧場，最高收視更高達36點，約226萬觀眾收睇。
做大戲謝觀眾
對於收視高開，阿姐噚日接受電話訪問話：「梗係開心，我都估唔到。」問佢想唔想《野》劇成為今年收視之冠？阿姐話：「𠵱家先係年頭，唔敢諗咁長遠，今年公司仲會有好多好劇推出。」黃宗澤就話：「我之前都冇估過幾多點，𠵱家個勢咁好，上星期最高有36點，我希望收視一路升，最好升到40點啦！」佢仲話到時想同阿姐齊齊做大戲答謝觀眾。
有報道話阿姐唔滿意《野》劇戲份被刪剪，搞到變成配角，監製張亁文噚日話：「我哋係靠阿姐食糊，點會咁做？好多時因為播映時間關係，呢個係正常刪剪。」至於剛過去嘅大除夕天氣轉冷，氣溫急降至10度，無綫當晚播映《幻彩詠香江》除夕倒數節目，竟然有24點收視，約151萬觀眾安坐家中迎08，收視唔錯。而亞視元旦日首播由陳小春同鄭伊健合演嘅劇集《霍元甲2008》，平均收視有3點，約18萬觀眾捧場。