在時尚圈，跟紅頂白乃家常便飯。那些是雞毛，那些是令箭，街外人其實唔會點理，況且有人拋貨有人接貨，暴發戶式壞品味永遠有死硬信徒盲從附和。不過，潮流事一向都有根有據，更唔會好似八達通咁一「嘟」就有。多得美國索女師傅KatVonD擔大旗的收視冠軍真人騷《L.A.Ink》，使Tattoo再次成為話題。港人終於明白，一幅幅如素描般的Freehand紋身，背後總有一個個故事，既然無人比你更能代表你自己，便該把身體變成宣示的平台，讓皮膚替你好好說話。
記者：梁敦濂
攝影：梁細權
場地提供：龍威紋身院
Gabe，神枱級土炮紋身師，曾替黃貫中、何超儀、張栢芝、李璨琛及本地眾多Band友落筆紋身。太出名，毋須多作介紹。Gabe話：「時代唔同喇，蠱惑仔都唔興紋身啦，博俾人認得你咩。𠵱家連律師、醫生、Banker同老師都玩紋身，感覺上多咗人接受，早幾日先至有個阿媽上嚟陪個女紋身。」
「最佩服KatVonD工作態度」
早前08潮流預告略略介紹過了：KatVonD，25歲。可能係全球最索最惡的女紋身師。
連行內人Gabe都喪追《L.A.Ink》，就知道索女師傅KatVonD擔大旗的紋身真人騷《L.A.Ink》有幾好睇。「你知唔知呢行以前真係無女仔，慢慢慢慢到𠵱家先至叫做多少少女TattooArtist，可想而知KatVonD有幾Tough。佢嘅素描底好厚，對肌肉紋理掌握得好準，漸變、透視同立體效果都做得非常出色，風格亦好強烈。」不過最叫Gabe佩服的，是KatVonD的性格同工作態度，「一個優秀的TattooArtist，一定要謙虛，太高傲反而會令自己故步自封。KatVonD同客人溝通得非常好，能夠滿足客人要求之餘，仲會適量注入自己創意加以發揮，完成之後，又會好耐心咁望住客人，個客滿意佢先至敢流露笑容。呢種發自內心嘅Care，令作品更有靈魂，呢啲就係佢成功嘅地方。」
每個紋身背後都有故事
看KatVonD的節目，除了炫目的紋身素描圖案，更令人看得着迷，是劇中會訪問顧客，講出一個個紋身背後的故事。入行多年，Gabe話有客人每逢失戀、失業，甚至或家裏有人離世都好，都會搵佢做一個紋身，用身體來留住人生中的重要時刻，多年來從無間斷。「你今日可能見到碧咸個紋身好潮好靚，跟住走嚟叫我幫你紋個一模一樣嘅，但係可能過多一年半載你就已經悶咗，想轉。其實真正靚嘅紋身，應該係一個有故事性嘅紀念圖案，而且需要經得起時間考驗。」去年Gabe就遇到了一班澳洲人，一行十多人，全部人一開聲便叫Gabe將中文「家」字紋在手臂內側。原來，曾經與整個家庭鬧翻了的大哥身患末期癌症，並選擇了香港作為其人生最後的一段路程，正因為這個病，大哥跟所有人都和好如初了，一家人在香港團聚之後，有了紋身的念頭。「成班人問我，可唔可以去醫院度幫佢哋大哥紋身，我一口就答應咗佢哋。嗰次係我第一次幫末期癌症病人做紋身，完成之後大哥望住個紋身好耐，好鍾意，之後大家一齊撐起右手影全家福嗰幕，我呢世都會記得。」
紋身師傅的紋身故事
楊卓
北京人，04年開始學紋身，短短3年時間已一鳴驚人勇獲國際獎項。喜以彩色圖案表達空間的立體感。
「現在北京很流行刺青，發展也特別快，差不多每一個年輕人都有刺，而且很有自己一派的流行風尚。我想每一個人都可以去刺，只要自己喜歡就行，當然有意思的圖案會更好，否則抽象一點也沒有問題。經典的東西總是會繼續流行下去，例如一些關於中國主題的景物。至於我自己就很喜歡RobertHernandez的作品，所以去年找他替我在頸項上做了一個黑白的圖，很有意思。」
LeonLam-Hien
越南裔法國紋身師，擅長各式割線。個人特別喜歡TribalPattern，現旅居香港。
「我是在法國里昂長大的。小時候我常常見到那些身上充滿紋身的士兵，覺得他們非常偉大，於是心裏想長大以後一定要做比他們更多的紋身。13歲那年，我偷了媽媽的針，替自己做了一個紋身，就是臂上這個了。在法國，紋身都很普遍，喜歡就做一個，就這樣簡單吧。當然，有時候人總想說些不滿意社會的話，不過現實歸現實，既然不能夠大聲地說出來，便應該讓皮膚替自己說話。」
擅長割線的Leon，作品看似簡單，但其實在比例、構圖等方面都做得相當細緻，具國際水準。
KatVonD醒你：紋身十戒
KatVonD，82年生於墨西哥，14歲第一次紋身，07年開始擔正紋身真人騷《L.A.Ink》。《L.A.Ink》好睇之處在於每集都會大爆顧客們紋身背後的故事，有怪雞有感性有搞笑有催淚，加上人緣極佳，ParisHilton死黨NicoleRichie、黑人女RapperEve、《Jackass》的Steve-O同即將來港出騷的樂隊MyChemicalRomance結他手FrankIero都曾經幫襯過KatVonD，令《L.A.Ink》人氣持續高企。
《L.A.Ink》今晚有得睇
《L.A.Ink》Season2逢星期三晚10點於Now電視213頻道播出。想重溫Season1，可以去DiscoveryChannel官網訂購DVDSet，每套$34.99美金。網址： http://shopping.discovery.com/product-66100.html?endecaSID=11754B32DDBD
1.戒江湖
無人再會紋兩條荊棘上身，想懷舊就另當別論。今年大熱Style包括有素描同Graffiti，唔好搞錯。
2.戒懶
行多幾間ShopAround，上到去視察一下環境，看看師傅有無外國發牌的協會會員證書，以及留意師傅忙唔忙，如果唔忙就即係無客，受歡迎程度相當有限。
3.戒Cheap
使唔起錢就千祈唔好去學人紋身，係都要將價就貨的話，到時紋得肉酸又要搵師傅改，咪又係一條數，儍仔。
4.戒空肚
紋身時間可長可短，所以帶定支水同埋少少Snacks，當然食飽至開始紋身就最好不過。
5.戒醉
紋身當日同之前一晚都盡量唔好去劈，費事影響血液運行。
6.戒躁熱
紋身之前，盡量保持身心處於良好狀態，而紋身時亦應該保持放鬆。
7.戒即興
紋身係一世嘅，就算將來可以用Laser幫你洗，都未必100%還原，所以切忌衝動，無謂將來後悔。
8.戒愛的紋身
除咗Out之外，愛的紋身其實好邪，好多情侶紋咗最後都分手收場，紋身係一世，但係試問你同佢又係咪可以Last到成世？
9.戒霸道
自己話晒事唔係唔得，不過有時個TattooArtist會有啲你無嘅Idea，畀啲創作空間佢，出來效果可能仲好。
10.戒污糟
如果地方大，亁淨，開揚，光線充足而且空氣流通，呢啲線索話你聽，呢個師傅應該靠得住。
Gabe拍心口推薦本地三大紋身店
1.藝之繪紋身廊（23683621）
尖沙嘴寶勒巷發利大廈1樓1號
2.TattooTemple（25253565）
中環威靈頓街62號威蘭樓1樓
3.鋒刺青（34278666）
尖沙嘴嘉蘭圍5-11號利時商業大廈16樓1610-1611室
紋身查詢：龍威紋身院（27291566）
尖沙嘴金馬倫道8號5樓