全球最大咖啡店連鎖集團星巴克，面對麥當勞等對手節節進迫，加上信貸危機同埋高油價令消費者勒緊荷包，終於向管理層開刀，行政總裁唐納德禮拜一啱啱俾人踢落台，由主席舒爾茨兼任，即時生效。
舒爾茨話，非常不滿星巴克現時官僚主義太重，美國分店亦太多，所以佢唔排除會裁員同埋簡化管理層，亦會減慢喺美國開設分店嘅步伐，仲要關閉一啲表現欠佳嘅美國分店。不過，集團計劃加快喺海外開設分店嘅步伐，同時亦會推出新產品、改善店舖設計，亦會加強對各地咖啡師嘅培訓，吸引更多顧客。
現年54歲嘅舒爾茨係老臣子，1982年加入時，星巴克只有四家分店，1987至2000年做過行政總裁，可謂一手湊大星巴克，令集團成為喺全球擁有超過1.5萬家分店嘅咖啡王國。事隔八年，重為馮婦，希望能夠挽救集團業務。
至於俾炒嘅唐納德，2002年先加盟星巴克，由2005年3月起做行政總裁。