秘書V患上傷風咳，好耐都未好，睇西醫食藥之後話頭暈，睇中醫食中藥話藥性慢，日頭咳幾聲，晚上睡覺就咳唔停，冇法子入睡，於是返工覺得好辛苦。
新年前食飯遇上醫生C，醫生C話最近「生意」好到不得了，睇唔停手，絕大部份都係因為天氣轉變，患上傷風咳。醫生C自嘲話：「我只係一個傷風咳醫生，其他病症唔多識！」如果係傷風咳真正專家，病人多到要在門口排隊啦，從收錢角度觀之，好正啫。
問醫生C治療傷風咳有何秘方，醫生C話：「我算係中西結合，因我讀完中醫課程，攞咗文憑，又攞咗針灸文憑，所以為病人睇病時，我會留意佢哋嘅體質血氣，配西藥時唔好畀一啲太強勁嘅藥丸，以免佢哋食咗之後，更唔舒服。據我積累經驗心得，香港男士女士嘅體質偏弱，不能吃勁藥，要吃溫和性藥丸，慢慢先會復元。」聽佢之言，醒起秘書V曾在藥房買入一隻P牌傷風咳丸，以為可以收清鼻水，可以瞓覺，誰知第二朝更弊，喉嚨亁涸之餘，鼻水又返番嚟，此是何故？
醫生C話：「P牌藥丸本是溫和、百搭藥丸，但係嗰隻傷風咳丸太勁，就令唔少香港人受不了，自問體質不佳者，吞呢款藥丸前最好問過醫生。我就比較少叫病人食呢隻藥。」如此複雜，都係費事在藥房買非配方藥物咯，一於小小病都去睇醫生。
新年賽馬，在馬場碰到肥B，佢見左丁山食下午茶餐，係咁食小型菠蘿油，猛叫左丁山唔好食。佢自己曾經中風，去深圳接受電療，居然奇蹟地好番，好似冇發生過。但肥B現在對飲食好小心，見肥就走。左丁山從來冇戒口（蝦蟹除外），肥B期期以為不可，介紹左丁山朝朝出門前飲「五青汁」，即係青蘋果、青瓜、苦瓜、青椒與西芹五種瓜果榨汁，每早一杯，肥B話佢現在血壓正常，血糖正常，五青汁功不可沒。有咁神奇？睇落好似甚為寒涼，等第日放長假之時，試飲幾日，睇吓會唔會有副作用先。