全城期待嘅《GT5P》行貨中文版月中就見街，唔想睇咁多日文嘅港九新界賽車手，終於可以一嘗次世代高清靚畫面嘅威力，等咗咁耐都幾值得。但如果唔啱玩呢種咁嚴謹嘅模擬駕駛類型，齋想過吓手癮搵啲街車鬥撞鬥閘，不妨試吓另一款歷代都大受好評嘅《Burnout》，佢嘅最新作《BurnoutParadise》唔單止集過往優點於一身，更開創零讀碟時間，務求令玩家唔使等到瞌眼瞓！
文：陳福榮
新圖象引擎勁到爆燈
自從《GT》面世，賽車遊戲就普遍分為凡事講求認真嘅真實模擬以及誇張到飛起嘅瘋狂類型，而且越嚟越各走極端，中庸之道反而冇運行。呢隻《BurnoutParadise》係由炮製好使好用中介軟件Renderware嘅Criterion負責，屬系列第五代作品，玩法保持一貫凌厲爽快特色，唔止速度高得驚人，兜頭撞落其他車輛更有前所未有嘅力量感。創作人話由於今次係首度真正登陸次世代機種，想唔出盡十成功力做到完全進化都唔得。
隨時開波自由度大
本作設有好多不同玩法，由最單純嘅限定時間直奔目的地、同對手爭第一、鬥破壞敵車數量甚至扮演特技人勁玩甩尾飛車等，幾乎噏得出嘅都有。而且為咗配合零讀碟、零選項嘅特色，所有競賽都可以隨時進行，只要將架車駛往特定起步點再同按L2、R2，就可能即時啓動唔使白白浪費時間，有玩過前幾集嘅應該會記得Load到幾慘。其實遊戲冠名Burnout，係因為只要達成甩個靚尾或者同敵車擦身而過等條件，就可以增加類似Turb嘅Burnout特量計，用嚟閘車效果事半功倍，所以能善用呢種性能就成為高低手嘅最明顯分野。
成個天堂島任你揸
以前咁多集雖然都算有好多賽道畀玩家揀，但問題係無論點都走唔出既有框框。呢次掛住個Paradise牌頭，唔止話畀大家知會好似漫遊天國咁自由自在，而且成個競走舞台仲直接發生晒喺呢個天堂島，用意係想藉住機能大幅增強，唔想再局限喺毫無變化嘅跑圈賽事度。𠵱家所有模式同賽道都連成一體，某程度都幾似《GTA》系列咁實在，再者為求做到不令人感到煩厭，架車無論去到邊都唔會黑畫面Load碟！喺咁嘅環境下依然做到每秒足60格嘅高密度優質畫面，絕對唔比《GT》系列輸蝕。
網上搵人挑機冇難度
前兩集如果想同人連線對戰，要好似普遍上網Game咁開定房仔等運到，真係等得嚟都蚊瞓。不過《BurnoutParadise》嘅最大強項，就係成功把在線離線兩種不同性質玩法糅合，無論咩情況都可以用十字掣揀選FriendList上嘅朋友加入。最多容許8人同時對戰，玩完又可以彈番出去單人模式，兩者互不牴觸認真抵讚。目前隻Game嘅試玩版喺美國同日本嘅PSStore，以及XboxMarketplace提供免費下載服務，想知啱唔啱自己玩不妨親身體驗一下，縱使佢只係開放咗部份地圖，但足以試晒所有基本內容，唔買都要單撈返嚟享受吓。
Profile
機種：Xbox360、PS3
廠商：EA
類型：RAC
人數：1-8人
日期：1月22日
售價：$380（PS3）、$299（Xbox360）
查詢：31666001
