近排相對濕度得六七十度，風高物燥，屯門山火都要三日先救熄，估唔到「火燭」熱潮蔓延到上市公司，繼日前冠捷科技（903）喺南美巴西嘅廠房失火，之後輪到真明麗（1868）喺廣東鶴山間廠中火劫。俗語有云：「火燒旺地」，不過真明麗同冠捷嘅股價就一啲都燒唔旺，仲有少少插水㖭！
真明麗噚日收報7.87蚊，跌0.38%，兩日累跌5.3%，夜晚就出通告交代火燭嘅殺傷力：星期一下晝，鶴山間裝飾燈生產廠房發生一場「小型火警」，燒到當日黃昏先救熄，呢場「小火」令一名員工返現場協助救火時喪生。竟然「小火」都可以致命。
通告仲話，「火警對生產及付運的影響輕微，並對集團的運作不會構成負面影響」，起火地點只係其中一個包裝物料倉庫，只燒毀「少部份」發泡膠、金屬部件同紙包裝物料存貨，咁「少部份」即係幾「少」呢？華華有同事去過廠房，大到要用高爾夫球車代步，仲喺每個區域有車站㖭！咁大間廠，存貨量一定唔會少得去邊。
冠捷燒廠 股價挫7.4%
呢場「小火」實際損失一隻字都冇提過，只話：「集團的保險已覆蓋有關損失」，投資者好難做評估，怪唔之得股價一啲都旺唔起啦！
至於生產電腦芒嘅冠捷，噚日發表通告，話喺1月4號清晨，喺巴西瑪瑙斯嘅生產廠房發生火警，冇人命傷亡，喺幾個鐘頭內撲熄，廠內部份存貨同設備損毀，初步估計損失唔多於500萬美元。聽冠捷嗰邊講，瑪瑙斯嘅廠房會喺1個月內恢復部份生產，間廠主要係供應巴西客人，07年嘅產量佔集團嘅總付運量少過5%。冠捷噚日股價急跌4.6%，報5.25蚊，兩日累積跌7.4%。
燒燶飛毛腿 股價挫五成
「火燒旺地」對生產手機電池嘅飛毛腿（1399）嚟講，就絕對唔啱聽。話說舊年5月31號，飛毛腿喺大陸福州嘅廠房發生大火，廠房嚴重焚毀，唔單止存貨俾銷毀，仲累到生產線要停頓，咁搞法，公司股價梗受波及，火災第二日，飛毛腿宣佈停牌，復牌後股價急挫一成三。
股價冇話火災越燒越旺，反而每況越下，慘不忍睹，原本一向備受投資者追捧嘅飛毛腿，股價從此一蹶不振，噚日收報1.79蚊，較火災前嘅3.55蚊，半年累積插水達五成，公司市值冇咗成半，得番17.8億銀。
後尾，飛毛腿點算火災損失，總共唔見咗2.2億人仔，但只係獲得保險公司賠償5220萬人仔，自己大嗱嗱要拎荷包貼番1.67億人仔，不過，好在飛毛腿董事長方金同班管理層都冇逃避責任，自願接受減人工嘅懲罰，總裁全年減薪三成，而其他主要行政人員就半年減薪一成。
電郵：mailto:[email protected]
