本嚟獨霸澳門嘅賭王何鴻燊，舊年俾全球最大賭場，美國拉斯維加斯嘅金沙連番狙擊，除咗喺澳門開金沙同威尼斯人，正面同賭王爭飯碗外，早幾個月仲辣埋航運業，開港澳豪華直升機服務兼港澳渡輪服務，轉個頭，連澳門手信呢一環都唔放過，佢搵埋外援香港嘅奇華餅家，喺威尼斯人度假村入面開分店，對到正咀香園，據聞咀香園同賭王四太極之友好，咁咪即係打對台囉！
奇華老闆黃錫祥話，係威尼斯人邀請佢哋嚟開店，佢唔怕同咀香園打對面，同類店舖喺埋一齊有協同效應，仲話大家唔係競爭，而係各有特色，仲話同「對家」關係好好，大家係世交。
咁奇華都係家族生意，家陣由黃錫祥為首嘅三兄弟睇住，佢哋同黃錫祥個仔黃嘉傑，噚日齊齊出席澳門首家奇華分店嘅開幕儀式，華華問黃公子要卡片，點知佢話冇帶，咁問佢負責啲乜，佢笑笑口話係打雜，乜都做，亦要飛勻港、台、美國同埋東京，巡視各地分店嘅生意，咁後生仔係要捱吓先出頭嘅。