新一年好多人都會買本運程書刨下，《巴西環球電視台》最近就搵嚟3位名占卜師，預測08年巴西5大球星同國際體壇嘅大勢，最得人驚係「肥哨」朗拿度會掛靴！
預言「肥哨」掛靴收場
話「肥哨」會收山嘅係巴西占卜界大佬波哥（Bosco），佢好詭異咁話：「肥仔將會淡出球壇，因為佢個心去咗第二度！」塔羅牌小天后阿A（Adriana）就話「肥哨」會加盟法林明高。至於另一墮落球星阿祖安奴，巴西「麥玲玲」絲娜拉（Cinara）就話佢今年繼續是非不斷！
巴塞球星朗拿甸奴今年會露曙光，波哥話佢08年有冠軍運，表現亦將重返頂峯！「玲姐」睇法亦差唔多，仲話「細哨」今年搵到真愛，伯母聽到實開心死啦！不過塔羅天后阿A就持相反意見，話「細哨」今年同舊年一樣，只會喺谷底徘徊。
07年測中卡卡大紅嘅波哥，話佢今年會紅到發紫，美斯、C朗只可以食塵，不過「玲姐」就話卡卡年初有阻滯，不過好快會反彈。至於07年上位好快嘅羅賓奴，3位都話今年會上得更快，塔羅天后阿A更加批佢將取代卡卡嘅地位㖭！
今年咁啱係奧運年，「玲姐」就話中國總獎牌數將超越美國，巴西男女足最多只係可以攞銀牌或銅牌，唔知巴西奧運隊教練鄧加聽到咩反應呢？其餘體壇預測方面，一級方程式賽車冠軍將屬於艾朗素，至於咸姆頓同馬沙表現不俗但同冠軍無緣；最奇怪係，3位大師都隻字不提衞冕嘅拉高倫，唔通呢位「芬蘭冰人」今季凍到僵咗？
我求大俠覺得占卜嘅嘢唔可以信到十足，成功與否運氣佔2分，再加3分實力同5分努力；一味大安旨意坐喺度等運到，真係財神行過都唔睇你啦！08年，一齊努力罷喇！
5大巴西球星預言
1〉朗拿度今年掛靴
2〉阿祖安奴是非纏身
3〉細哨今年會拍拖
4〉羅賓奴卡卡鬥紅
5〉巴西足隊無緣奧運金牌