無綫將於本周六舉行《2007年度十大勁歌金曲頒獎典禮》，據知陳奕迅（Eason）和容祖兒將齊齊冧莊，穩奪最受歡迎男、女歌星獎，祖兒更有機掃低楊千嬅，開齋兼得亞太區最受歡迎香港女歌星。至於Eason繼在商台頒獎禮上輸給來勢洶洶的同門師弟張敬軒，痛失至尊歌曲後，二人將在《勁歌》再次火併，爭奪金曲金獎，軒仔昨日直言Eason已上岸，長江後浪推前浪是必然之事，對再下一城信心十足。
陳奕迅近年威盡樂壇，奪獎無數，不過去年以《酷愛》一曲紅至開巷的張敬軒，卻成為Eason勁敵，來自新藝寶的Eason和環球唱片的軒仔份屬同系公司的師兄弟，奈何一山不能藏二虎，日前軒仔在商台頒獎禮上首度揮低Eason，憑《酷愛》力壓Eason的《Cryingintheparty》，勇奪至尊歌曲。本周六晚無綫舉行《2007年度十大勁歌金曲頒獎典禮》，派發第三張樂壇成績表，屆時二人將再度正面交鋒，爭奪金曲金獎。
Eason在商台頒獎禮上眼白白看着軒仔風騷捧走至尊歌曲，賽後接受訪問時曾話中有骨，謂十大不入的鄧麗欣所唱的《電燈膽》比他的歌曲更hit，顯然對輸給軒仔一事頗不順氣。失落商台大獎，Eason對《勁歌》金曲金獎更倍有寄望，唱片公司也因而備受壓力，既要捧軒仔上位又要力保Eason地位，的確左右做人難。據知金牌唱片也加入爭獎戰圈，正為古巨基的《愛回家》努力「劈獎」。
後浪衝前
「目標係跟住佢上岸」
昨日記者致電軒仔，提到《酷愛》成金曲金獎大熱時，他表示自己會以平常心面對，他說：「如果真係攞到金曲金獎，可能今年已經係我嘅最高峯，我會有啲驚，一嚟太快啦，其實呢輪頒獎禮過後，我有啲不安，我係個危機感好重嘅人，上帝畀啲嘢你，佢又會攞番走一啲嘢。」軒仔去年歌唱事業突飛猛進，甚至威脅Eason，問他會否覺得長江後浪推前浪？他直言：「係必然，Eason同克勤上咗岸，一個浪最後都係上岸，我哋嘅目標都係跟住佢哋上岸，唔係一個貶詞，他日我哋都會有後浪。」言談間倒滿有自信。
否認不和
「做呢行都係為搵錢」
軒仔強調與Eason沒有不和，他說：「我同Eason都唔係對獎項睇得重嘅人，攞獎唔係應份，大家都畀心機努力做嘢，我唔信大家會有心病，做呢行唔係為攞彩，最後都係為搵錢。」
雖然Eason被軒仔狙擊，但他應冧莊攞硬《勁歌》最受歡迎男歌星獎，最受歡迎女歌星則會是五連霸的容祖兒。基於劉德華和陳慧琳（Kelly）雙雙退選亞太區最受歡迎香港男、女歌星，男歌星獎將由李克勤接棒捧走，反而一度盛傳接Kelly棒的楊千嬅則未必有望，大有機會由容祖兒開齋兼得，同時捧走兩大獎項。
採訪：林妃
十首金曲預測 分獎難過分囗肉
除了《勁歌》大獎外，各唱片公司也出力為旗下歌手爭取10大金曲名額，現時10首金曲得主初步已有定斷，其中東亞及環球系各得3首最多，英皇及金牌則各獲兩首。本來許志安也有歌得獎，但他為到內地演出搵真銀缺席，名額轉了給王菀之，而鄧麗欣的《電燈膽》本來也有獎，但其所屬金牌唱片卻寧將獎項轉給得寵的側田，故將獎項分給了《男人KTV》。撰文：丁寧
得獎歌手：楊千嬅 所屬公司：東亞系
得獎歌手：何韻詩 所屬公司：東亞系
得獎歌手：王菀之 所屬公司：東亞系
得獎歌手：陳奕迅 所屬公司：環球系
得獎歌手：李克勤 所屬公司：環球系
得獎歌手：張敬軒 所屬公司：環球系
得獎歌手：容祖兒 所屬公司：英皇
得獎歌手：Twins 所屬公司：英皇
得獎歌手：古巨基 所屬公司：金牌
得獎歌手：側田 所屬公司：金牌
街訪：《酷愛》民意贏成倍
每年樂壇都有不少好歌，當中有些可實至名歸奪得獎項，有些歌卻只紅歌不紅人，自然就與獎項無緣，記者嚴選5首去年hit爆金曲進行民意調查，訪問了30位市民，讓他們選出心中最愛，5首歌包括張敬軒《酷愛》、古巨基《愛回家》、鄧麗欣《電燈膽》、關菊英《講不出聲》及陳奕迅《Cryingintheparty》，最終由《酷愛》以14票大熱姿態勝出，跑贏第二位擁7票的《Cryingintheparty》一倍之多，古巨基《愛回家》有5票，至於兩位女將齊奪兩票雙雙包尾。採訪：駱華齡
攝影：仇志德
火星：其實我冇乜點聽香港啲歌，多數都係聽台灣歌，不過如果呢5首歌嘅話，我就會揀張敬軒首《酷愛》，因為佢唱得好好聽。
任小姐：我揀《酷愛》，因為真係好好聽，至於其他歌我都有聽過，但都只係覺得OK啫。
鄭小姐：陳奕迅唱呢首《Cryingintheparty》唱得好好聽，其他歌都有聽過，但相比之下就呢首較突出，好似《講不出聲》咁聽得多都會悶啦。
簡先生：我會揀關菊英首《講不出聲》，因為係電視劇嚟講呢首係比較特別嘅主題曲，我都有追睇過《溏心風暴》，不過其實就算冇追過，大家都會聽過呢首歌。
