有韓國女版SuperJunior之稱嘅9人組合少女時代，出道只有半年，但已吸納唔少韓國少男fans。不過阿Deep日前就喺香港討論區見到有個「少女時代的整容全紀錄（真實！！）」嘅討論，9位成員出道前後都幾乎兩個樣，唔通唱片公司勒令佢哋出道前，要先去醫院整靚自己？
扯高豬膽鼻
最受歡迎嘅Tiffany被網友指整得最厲害，出道前嘅豬膽鼻竟然變得又直又高，完全係現實版嘅「醜小鴨變天鵝」。舞功至勁嘅HyoYeon就被網友ANGELICMONIQUE問：「係咪照住宋慧喬個樣嚟整㗎……整完之後好似宋慧喬喎。」YoonA、SeoHyun同隊長TaeYeon被指整得較少，出道前後分別唔大。
少女時代畢竟唔夠20歲，所以有網友都提出疑問，會唔會係女大18變，或者化妝技巧令佢哋全部變成索女？不過，正如manfai2005所講：「韓國整容家常便飯。」而寶狐亦稱：「整容又點，最怕係整容失敗……𠵱家靚女就得啦！」睇嚟香港網友都開始接受藝人整容喎！
版主：網盜王尊尼Deep
本欄逢周一至五刊出
少女時代整容討論：
網址： http://www.discuss.com.hk/viewthread.php?tid=6152400